Cristiano Ronaldo nuk do të jetë pjesë e formacionit të Manchester United, për sfidën e ditës së shtunë ndaj Chelsea. Arsyeja mësohet të jetë një masë disiplinore e klubit, për të ndëshkuar sjelljen e CR7 në sfidën ndaj Tottenham. Superstari portugez u largua nga stoli drejt dhomave të zhveshjes në minutën e 89’ të takimit, duke refuzuar të futej në lojë si zëvëndësues në minutat e fundit.
Në përfundim të sfidës, trajneri Erik ten Hag u shpreh se do të sqaronte situatën me Ronaldo. Ky i fundit gjithashtu shfaqi pakënaqësitë e tij në sfidën ndaj Newcastle, kur u zëvëndësua nga trajneri hollandez. Ndërkohë, ndeshja ndaj Chelsea është mjaft e rëndësishme për United, pasi “Djajtë e Kuq” ndodhen vetëm 1 pikë larg londinezëve që mbajnë vendin e katërt.
Ish-sulmuesi i kombëtares angleze, Gary Lineker, komentoi mbi situatën e krijuar mes Ronaldo dhe klubit. Lineker u shpreh se sjellja e sulmuesit është e papranueshme. Ashley Williams ndërkohë vuri në dukje faktin se situata e krijuar nga portugezi ka hequr vëmendjen nga paraqitjet e mira të United së fundmi, sidomos ndaj ekipeve “big”.
Ndërkohë, ish-mbrojtësi i “3 Luanëve”, Micah Richards, komentoi:
“Trajneri (Ten Hag) kishte probleme me të në fillim të sezonit, gjatë ndeshjeve para-sezonale, dhe tani po vazhdon e njejta situatë. Mendoj se në këtë pikë ka vetëm një mënyrë sesi mund të zgjidhet situata. Ata (United) duhet të arrijnë në një akord në janar dhe ta lënë Ronaldon të largohet. Ai po vë në pikëpyetje rolin e trajnerit dhe mendoj se është më mirë që të largohet.”
Peter Schmeichel ndau të njejtin mendim me kolegët e tij, teksa u shpreh i zhgënjyer me superstarin e United. Sipas tij klubi ndodhet në një periudhë tranzicioni, dhe nuk ka nevojë për situata të tilla që shkaktojnë shpërqëndrim.