Drejtuesit e Crystal Palace janë shumë pranë shkarkimit të trajnerit Roy Hodgson. Bordi drejtues i klubit jo vetëm që është tashmë i bindur për vendimin, por ka gjetur dhe një favorit të fortë, për të zëvëndësuar Hodgson në krye të pankinës. Bëhet fjalë për ish trajnerin e Eintracht Frankfurt, Oliver Glasner. Ky i fundit mendohet se ka pranuar ofertën e Crystal Palace, dhe është gati për të ndërmarrë një projekt afatgjatë të klubit.
Crystal Palace ndodhet momentalisht në vendin e 15 në renditjen e përgjithshme të Premier League, vetëm 5 pikë larg zonës së rënies nga kategoria. Ekipi po kalon një sezon mjaft të vështirë, dhe u mposht në ndeshjen e fundit në kampionat ndaj Chelsea, me rezultatin 3-1. Ndeshja e rradhës në Premier League për Palace do të jetë ajo ndaj Everton në Goodison Park ditën e hënë, dhe nuk dihet nëse Hodgson do të jetë në krye të klubit.
Crystal Palace është mposhtur në 10 nga 16 takimet e fundit në Premier League. Tifozët e klubit kanë kohë që protestojnë dhe kërkojnë shkarkimin e trajnerit Roy, ndërkohë që nuk janë të lumtur as me politikat e bordit drejtues. Sezonin që lamë pas, Hodgson mori drejtimin e Palace në 10 ndeshjet e fundit, dhe ekipi e mbylli kampionatin në vendin e 11.
Këtë sezon pritshmëritë ishin më të larta për Crystal Palace, por duket se problemet vetëm sa janë thelluar dhe klubi ka nevojë për një ndryshim më madhor. Pas humbjes ndaj Chelsea, Hodgson u shpreh se shpreson që fansat e klubit të jenë realistë për situatën. Trajneri veteran përmendi dhe një herë tjetër listën e gjatë të dëmtimeve, si dhe vuri në dukje se ka ende lojtarë të rinj që po mundohen të gjejnë veten e tyre. Por duket se këto justifikime nuk do të shpëtojnë Roy Hodgson nga shkarkimi.
