Këtë sezon Premier League do të pauzojë të gjitha ndeshjet e saj për një periudhë 6 javore, për t’i lënë hapësirë zhvillimit të Kupës së Botës. Kjo do të thotë se kampionati do të rikthehet vetëm në datë 26 dhjetor, dhe kjo padyshim do të ketë efektin e vet në formën e skuadrave. Botërori i Katarit do të startojë në 20 nëntor, dhe finalja do të luhet në 18 dhjetor.
Momentalisht Arsenal kryeson Premier League-ën me 37 pikë, 5 më shumë se Manchester City që mban vendin e dytë. Të besuarit e Mikel Artetës kanë fituar 12 nga 14 takimet e luajtura deri më tani, dhe çdo ekip që e ka regjistruar më parë këtë statistikë, ka fituar në fund titullin kampion. Gjithsesi, shumë prej lojtarëve të Arsenal pritet të kenë rol kyç me kombëtaret e tyre në Botëror, dhe kjo padyshim që mund të ndikojë progresin e ekipit në mbarim të Kupës së Botës. Megjithatë, londinezët nuk pritet të humbin ritmin e tyre.
Newcastle ndërkohë ka suprizuar këtë sezon, teksa mban momentalisht vendin e tretë në renditje, me vetëm 7 pikë më pak se Arsenal. Organizimi i skuadrës është mjaft solid, dhe ekipi ka 3 lojtarë që do të aktivizohen në Katar. Kjo i jep mundësi trajnerit Howe që të përgatisë më me qetësi pjesën e mbetur të sezonit, duke qënë se pjesa dërrmuese e skuadrës do të jetë pushim. Kjo do të thotë se lojtarët do të jenë më të çlodhur sesa rivalët e tyre.
Manchester United ndërkohë po kalon një moment mjaft të mirë, por shumë prej lojtarëve të “Djajëve të Kuq” pritet të jenë protagonistë me përfaqësueset e tyre në Botëror. Trajneri Ten Hag sipas të gjitha gjasave i druhet një dëmtimi të mundshëm në mbrojtje, reparti që ka rezultuar më delikati për United.
Chelsea ndërkohë nuk ka fituar asnjë prej 5 sfidave të fundit në kampionat, dhe trajneri Potter do të shfrytëzojë pauzën e Botërorit për të gjetur “inspirimin” e duhur, që ekipi t’i rikthehet rezultateve pozitive. E njeta gjë mund të thuhet dhe për Liverpool, që po kalon një moment vërtet delikat.
