Ish-trajneri i Arsenal dhe Villarreal, Unai Emery, është ndër favoritët kryesorë për të pasuar Steven Gerrard në krye të pankinës së Aston Villa. Drejtuesit e klubit janë në bisedime me teknikun spanjoll dhe palët po komunikojnë mbi detajet e kontratës së mundshme. Gerrard u shkarkua pas humbjes 3-0 ndaj Fulham javën e kaluar.
Aston Villa ndërkohë ia doli të fitonte 4-0 përballë Brentford ditën e diel, nën drejtimin e Aaron Danks, ndihmës-trajnerit të skuadrës. Kjo ishte vetëm fitorja e tretë për ekipin këtë sezon në Premier League.
Unai Emery iu bashkua Villarreal në vitin 2020, pas aventurës së shkurtër me Arsenal. Spanjolli u shkarkua nga klubi londinez në vitin 2019, pasi kaloi 18 muaj në krye të pankinës në Emirates. Shkarkimi erdhi pasi Arsenal dështoi të fitonte në 7 ndeshje rresht, rekordi më i keq në atë kohë, që prej vitit 1992.
Megjithëse Emery ia doli të kualifikonte Arsenal deri në finalen e Europa League, “topçinjtë” u mposhtën nga Chelsea, duke mos arritur të shpallen kampionë. Por megjithatë, tekniku spanjoll ia doli të ngrinte lart trofeun, 2 vite më vonë me Villarreal. Për më shumë, Emery udhëhoqi të tijët në gjysmëfinalet e Champions League sezonin e kaluar, një arritje e jashtëzakonshme, pavarësisht eleminimit nga Champions League. Momentalisht Villarreal gjendet në vendin e 7 në renditjen e La Liga.
Emery u kontaktua nga Newcastle vitin e kaluar, por trajneri e refuzoi propozimin e klubit. Spanjolli duket më afër Aston Villa, por këta të fundit nuk duan të rrezikojnë, dhe po punojnë në të njejtën kohë dhe mbi një plan B. Drejtuesit e klubit janë në bisedime dhe me përfaqësues të trajnerit të Benfica, Ruben Amorin. Ndërkohë opinion sportiv e ka mirëpritur me pozitivitet lajmin për afrimin e mundshëm të Emery tek Aston Villa, duke vlerësuar cilësitë dhe disiplinën e teknikut të Villarreal.
