Manchester United është mposhtur përsëri në Premier League, kësaj rradhe në transfertë ndaj West Ham me rezultatin 2-0. Kjo ishte humbja e tetë për këtë sezon e të besuarëve të trajnerit Ten Hag, dhe duket se kriza sa vjen e thellohet në Old Trafford.
U deshën plot 72 minuta që të vinte goli i parë i sfidës, kur Lucas Paqueta dha një asist fantastik për Jarrod Bowen, i cili dhe me pak fat arriti të kalojë portierin Onana duke shënuar golin e parë për West Ham. Më pas, vetëm 6 minuta më vonë, Mohammed Kudus shfrytëzoi gabimin e Kobbie Mainoo në prapavijë, duke rrëmbyer topin dhe duke mposhtur përsëri Onana me një goditje mjaft të saktë në cepin e poshtëm të portës.
Manchester United ndërkohë ka fituar tashmë vetëm 1 nga 5 ndeshjet e fundit. Në përfundim të sfidës, trajneri Ten Hag u shpreh se të gjithë duhet të mbajnë përgjegjësi për situatën e vështirë. Nga ana tjetër, realizuesi i golit të parë për West Ham, Jarrod Bowen, gjithashtu komentoi ndeshjen. Bowen u shpreh i lumtur për fitoren, teksa përcaktoi objektivat që klubi duhet të ketë sipas tij:
“Duhet të jemi minimalisht në 6 ekipet e para në renditje. Por mendoj se kur shikon 10 ekipet e para në renditje sot, kupton që gara është më e hapur se kurrë. Aston Villa, Brighton, Chelsea, janë të gjitha ekipe të forta. E vetmja gjë që mund të bëjmë është të fitojmë ndeshjet tona, por duam të jemi minimalisht mes 6 ekipeve të para, padyshim.”
Fitorja në shtëpi e vendos tashmë West Ham në vendin e gjashtë në renditjen e Premier League. Ndërkohë, Manchester United ndodhet në vendin e 8, shumë larg pritshmërive të fansave, por dhe vet trajnerit Ten Hag.
