Kylian Mbappe u detyrua të linte fushën e blertë në fitoren e Paris St-Germain ndaj Marseille, për shkak të një dëmtimi. Ylli francez pati një përplasje me Leonardo Balerdi, e cila u pa qartë se ndikoi në formën fizike të sulmuesit. Mbappe u përpoq të vazhdojë lojën, por u zëvëndësua përpara startit të pjesës së dytë.
Pas përfundimit të takimit mediat franceze raportuan se bëhet fjalë për një dëmtim në kyç, i cili nuk është serioz, por gjithsesi pritet të lërë sulmuesin jashtë fushave të blerta, për një periudhë të caktuar. Sipas burimeve pranë klubit, Mbappe mund të humbasë përballjen me Newcastle në Champions League në date 4 tetor. Gjithsesi, në ditët në vijim pritet një raport më i detajuar për shkallën e dëmtimit të francezit.
Ndërkohë, përsa i përket kronikës së ndeshjes, PSG siguroi një fitore të rëndësishme dhe të sigurtë përballë një kundërshtari të fortë si Marseille. Parizienët shënuan plot 4 gola, me autorë Achraf Hakimi, Randal Kolo Muani dhe Goncalo Ramos që shënoi 2 herë. Fitorja ngjit kështu PSG në vendin e tretë në renditjen e Ligue 1, me 2 pikë më pak sesa Brest që kryeson momentalisht renditjen.
Të besuarit e trajnerit Luis Enrique patën humbur ndeshjen e fundit në kampionat përballë Nice në shtëpi, me rezultatin 2-3. Pritshmëritë janë të larta për teknikun spanjoll, i cili pavarësisht se ka detyrën e vështirë të formimit të një ekipi të ri, nuk mund t’i falë vetes gabime në kampionat.
Marseille nga ana tjetër po kalon një moment të vështirë, teksa njësoj si PSG, ekipi po mundohet të gjejë një identitet të ri loje, pas shkarkimit të trajnerit Marcelino. Momentalisht Marseille mban vendin e shtatë në renditjen e përgjithshme të Ligue 1, por sezoni sapo ka filluar dhe ka ende shumë ndeshje për t’u luajtur.