Sipas raportimeve më të fundit të mediave franceze, Kylian Mbappe ka pranuar më në fund një ofertë nga Real Madrid. Duket se sagës së gjatë të transferimit të superstarit francez i ka ardhur tashmë fundi, teksa Mbappe pritet t’i bashkohet madrilenëve në fund të këtij sezoni. Sulmuesi jo vetëm ka pranuar ofertën e klubit spanjoll, por gjithashtu ka njoftuar PSG paraprakisht, dhe duket se kësaj rradhe nuk do të ketë pengesa nga drejtuesit parizienë.
Mediat franceze bëjnë me dije se Mbappe është njohur tashmë dhe me termat financiarë të kontratës së tij të re. Sulmuesi do të përfitojë më pak krahasuar me propozimin që Real bëri në vitin 2022, kur Mbappe pavarësisht se ishte shumë afër firmosjes me galaktikët, vendosi përfundimisht të qëndronte përsëri te PSG.
Sipas “The Athletic”, drejtuesit e Real Madrid i kanë vendosur Mbappe si afat mesin e muajit janar, për të vendosur përfundimisht mbi lidhjen e kontratës sezonin e ardhshëm. Përfaqësuesit e klubit spanjoll duan që të zyrtarizojnë marrëveshjen sa më shpejt, në mënyrë që të shmangin skenaret e mëparshme. Real nuk u dorëzuar asnjëherë në ndjekjen e Mbappe, ndërkohë që si rrallë herë më parë, vet presidenti Florentino Perez është përfshirë disa herë në bisedime direkte me Mbappe.
Francezi do të jetë lojtari më i paguar tek “Los Blancos”, ndërkohë që ende nuk dihen detajet e tjera lidhur me propozimin e Real. Në vitin 2022, drejtuesit e klubit spanjoll ishin të gatshëm t’i ofronin plot 26 milionë euro në sezon talentit francez. Kësaj rradhe pritet një shifër më e ulët. Ndërkohë transferimi i Mbappe duket gjithnjë e më i realizueshëm dhe për faktin se lojtari ka komunikuar prej kohësh me drejtuesit e PSG, idenë e largimit në fund të sezonit dhe të dyja palët do të jenë të përgatitura për të shmangur situata të pakëndshme.