Mesfushori i talentuar i Manchester United, Paul Pogba, është nën shënjestrën e francezëve të Paris St-Germain. Gjigandët e Ligue 1 po mendojnë të shesin disa prej lojtarëve të tyre, për të siguruar shumën e nevojshme për transferimin e mesfushorit në Paris. Sipas prestigjozes Mirror, shuma që francezët duhet t’i paguajnë “Djajëve të Kuq” për transferimin e Pogba është rreth 50 milionë paund. Megjithatë, sipas burimeve afër klubeve, PSG ende nuk ka kontaktuar në mënyrë zyrtare anglezët për të diskutuar mbi një marrëveshje të mundshme.
Klubi francez mund të shesë deri në 9 lotjarë për të plotësuar kushtet fiananciare që pritet të kërkojnë anglezët e United. Kjo pasi parizienët gjithashtu duhet të plotësojnë fondet për rrogat e majme vjetore të Kylian Mbappe dhe Neymar. Zgjatja e kontratës me Mbappe ka qenë objektivi kryesor i PSG përsa i përket merkatos, por me interesin jashtëzakonisht të lartë për sulmuesin nga klubet europiane, një pagë e lartë është kusht i domosdoshëm që sulmuesi të mos braktisë klubin. Me kontratën e re, Mbappe pritet të përfitojë pak a shumë, të njejtën pagë vjetore me Neymar.
Ndërkohë, lajme mjaft interesante vijnë dhe nga Spanja. Raphael Varane, që aktivizohet si mbrojtës i qendrës me madrilenët, është pranë një transferimi drejt Manchester United. E përditshmja spanjolle AS është e bindur se lëvizja do të kompletohet brenda disa ditësh, dhe zyrtarizimi nuk do të vonojë.
Ndër zhvillime të tjera mbi merkaton, uellsiani Gareth Bale po përflitet për një lëvizje drejt MLS në Shtetet e Bashkuara. Gjithsesi, burime jo zyrtare bëjnë me dije se lojtari nuk është dakord me këtë ide. Bale dëshiron të vazhdojë kontratën e tij me Real Madrid, dhe nuk është gati për një transferim në USA, i cili në shumicën e rasteve nënkupton kapitullin e fundit në karrierën e një futbollisti.
