Sulmuesi i Manchester City, Raheem Sterling, ka konfirmuar mundësinë e largimit nga “qytetarët”, nëse trajneri Guardiola nuk i jep më shumë minuta loje.
Futbollistit i skadon kontrata në vitin 2023, dhe gjatë këtij sezoni, ka startuar vetëm 2 ndeshje si titullar në Premier League. Në një intervistë të fundit, Sterling ka bërë me dije se ëndrra e tij që në fëmijëri, ka qenë të luajë jashtë Anglisë. Rrethanat e vështira të këtij sezoni, duket se e kanë bërë lojtarin, të mendojë seriozisht mundësinë e një transferimi.
Sulmuesi deklaroi:
“Nëse do të ishte mundësia që të luaja diku tjetër, do të isha i hapur. Në momentet që flasim, futbolli është gjëja më e rëndësishme për mua. Gjithmonë kam patur dëshirë që mbase një ditë, të luaj diku jashtë Anglisë, dhe të shikoj se sa do të mund ta përballoj sfidën.”
Ardhja e Jack Grealish nga Aston Villa për shumën e 100 milionë paundëve, i ka bërë gjërat më të vështira për Sterling. Konkurrenca për vendin e titullarit në sulm tashmë është shumë e lartë, pasi të dy futbollistët aktivizohen në të njejtin pozicion. Ferran Torres është gjithashtu një tjetër alternativë, megjithëse ky i fundit është momentalisht i dëmtuar.
Sterling shtoi:
“Unë nuk jam person që ankohem. Për këtë arsye nuk e kam bërë këtë çështje më të madhe seç duhet. Thjesht po mundohem të luaj futboll dhe të shënoj rregullisht.”
Në qoftë se Sterling rigjen hapësirat e duhura në skuadrën e Guardiolës, mundësia e një largimi duket e ulët. Futbollisti iu bashkua City-t në vitin 2015, dhe ka fituar 3 herë Premier League-ën në Etihad. Gjithashtu, ai ka ngritur lart trofetë e FA Cup dhe EFL Cup. Champions League është ende në listën synimeve të Sterling, por mbetet për t’u parë nëse lojtari do të triumfojë në arenën europiane me City.