Raphael Varane është tashmë lojtari më i ri i Manchester United. Superstari i Real Madrid iu bashkua anglezëve, në atë që shumë veta po e konsiderojnë si një super lëvizje merkatoje nga ana e “Djajëve të Kuq”. Francezi iu bashkua skuadrës së drejtuar nga Ole Gunnar Solskjaer për shifrën e 34 milionë paundëve. Por a mundet Varane të ndihmojë ekipin e tij që të triumfojë këtë sezon në Premier League?
Sir Alex Ferguson kishte shprehjen e tij: “Sulmi të ndihmon të fitosh ndeshje, mbrojtja të ndihmon të fitosh tituj.” Shumica e ekipeve që kanë triumfuar në kampionatin anglez, kanë qenë të ndërtuara mbë bazën e një vije difensive të fortë e të qëndrueshme. Shembulli më i freskët është ai i Liverpool.
Në sezonin 2016-2017, përpara se klubi të nënshkruante me Virgil van Dijk, Liverpool pësoi 42 gola në 38 ndeshje në Premier League. Sezonin e ardhshëm në të cilin u aktivizua hollandezi, Liverpool pësoi vetëm 22 gola dhe një vit më vonë fitoi kampionatin. Ky është një tregues i qartë se një mbrojtës me eksperiencë si Varane mund të ndihmojë në të njejtën mënyrë “Djajtë e Kuq”, duke mbyllur hapësirat në prapavijë. Francezi zotëron shpejtësi dhe një partneritet në mbrojtje mes tij dhe Harry Maguire duket si një strategji e destinuar të sjellë siguri.
Një tjetër pikë mjaft e fortë e Varane janë dhe dyluftimet në ajër. Ky atribut është mjaft i rëndësishëm, sidomos gjatë goditjeve standarte në zonë. Forca në ajër e mbrojtësit shpesh herë është vënë re dhe në aspektin ofensiv dhe francezi ka arritur të gjejë disa herë rrugën e rrjetës me Real Madrid. Mbi të gjitha, Varane di të fitojë! Lojtari është aktivizuar në 10 finale, duke përfshirë 3 finale Champions League dhe 1 finale Botërori, duke i fituar të gjitha.
