Barcelona do të shkarkojë trajnerin Ronald Koeman, dhe kjo gjë mund të ndodhë edhe përpara ndeshjes së rradhës që do të luajnë katalanasit. Ky ka qenë raportimi i gazetarit spanjoll, Guillem Balague, i cili e ka ndjekur nga afër situatën e klubit spanjoll, pas humbjes shokuese 3-0 përballë Benficas, në Champions League.
Balague bëri të ditur:
“Është thjesht çështje kohe përpara se të dëgjojmë lajmin se Koeman është shkarkuar. Ka pasur një takim mes drejtuesëve të klubit, sapo mbërritën në Barcelonë pas transfertës në Portugali. Prezent ishte dhe presidenti Joan Laporta dhe të gjithë së bashku, po bëjnë gati një plan për të ardhmen. Pika kyçe është koha, përveç shkarkimit të Koeman, duhet menduar për një alternativë tjetër.”
Trajneri hollandez ka pasur vazhdimisht një raport të tensionuar me presidentin e klubit Laporta, dhe largimi i Lionel Messit, vetëm sa ia bëri akoma më të vështirë situatën teknikut. Koeman është i pezulluar në ndeshjen përballë Atletico, dhe drejtuesit e klubit po mendojnë momentin më të përshtatshëm për të zyrtarizuar shkarkimin e tij. Sipas gazetarit Balague, sido që të shkojnë gjërat, largimi i teknikut është tashmë një vendim i qartë dhe i formës së prerë.
Ndërkohë në një komunikim të fundit për mediat, hollandezi u shfaq i frustruar nga e gjithë situata e krijuar:
“Jam ende këtu, por kam sy dhe veshë dhe shumë gjëra mbërrijnë tek unë. Jam lodhur së mbrojturi veten. Nuk ka më kuptim. Sot nuk është dita, por në një moment tjetër do të jap mendimin tim se çfarë mendoj për gjithë këtë situatë.”
Ish-trajneri i Everton dhe kombëtares hollandeze refuzoi të komentonte raportet e tij me presidentin Laporta, duke u përgjigjur shkurtimisht se është ende pjesë e klubit.
Ndërkohë Barcelonën e pret një përballje mjaft e vështirë ndaj Atletico Madrid në kampionat, teksa katalanasit do të luajnë përballë kampionëve në fuqi të La Liga.
