Erling Haaland në vitin 2024. Ky është objektivi i Real Madrid sipas asaj që ka zbuluar prestigjozja AS, e cila bën me dije se madrilenët janë duke planifikuar një lëvizje të mirë-kalkuluar për kartonin e norvegjezit.
Në kontratën e firmosur së fundmi me Manchester City, Haaland ka të parashikuar dhe një klauzolë për prishjen e marrëveshjes me “qytetarët”. Kjo pasi futbollisti është i hapur për aventura të reja, dhe galaktikët janë një opsion mjaft premtues. 150 milionë euro është shifra e klauzolës, që Real Madrid parashikon të aktivizojë pas 2 vitesh.
Ndryshe nga rasti i Mbappe, vendimi i Haaland për t’iu bashkuar Manchester City këtë sezon nuk ka ndikuar negativisht në marrëdhënien e tij me klubin madrilen. Spanjollët janë të gatshëm të presin, duke qënë se në 2023-shin, Haaland do të jetë vetëm 23 vjeç. Një tjetër avantazh i kësaj pritjeje është mundësia që galaktikët kanë për të parë se sa do ta përballojë Haaland nivelin fizik të lojës në Premier League. Dëmtimet e shumta e kanë shoqëruar lojtarin në 2 sezonet e fundit, dhe kjo mund të jetë një shenjë mjaft domethënëse për karrierën e tij. Florentino Perez ka kështu kohë për të parë nëse këto dëmtime kanë qënë thjesht fat i keq, apo një “minë me sahat” që mund të shpërthejë në çdo moment, duke dëmtuar karrierën e sulmuesit.
Gjithashtu, Karim Benzema po kalon formën më të mirë në karrierën e tij, dhe kjo do të thotë se Real e ka një titullar në rolin e numrit 9. Kjo gjë u konfirmua dhe nga presidenti i klubit Florentino Perez, i cili në një intervistë të fundit deklaroi se spanjollët nuk kishin qëllim të firmosnin me Haaland këtë sezon. Sipas Perez, tifozët e Real duhet të presin të paktën deri në 2023-shin nëse duan të shohin norvegjezin në Santiago Bernabeu.