Spanjollët e Real Madrid janë gati të mirëpresin oferta për kartonin e Isco dhe atë të Gareth Bale. Tashmë që merkatoja e janarit është shumë afër, presidenti Florentino Perez nuk ka përjashtuar mundësinë e largimit të 2 yjeve të galaktikëve.
Kontrata e të dy lojtarëve skadon në fund të sezonit, më saktësisht në 30 qershor, por “Los Blancos” duket se nuk kanë vullnet pozitiv për të diskutuar një rinovim kontrate me Isco dhe Bale. Që prej ardhjes së Carlo Ancelottit në krye të pankinës së spanjollëve, futbollistët nuk kanë patur shumë hapësira në formacionin titullar, dhe burime jo zyrtare pranë Real, bëjnë me dije se pakënaqësia e lojtarëve është në rritje.
Por e tillë është dhe pakënaqësia e tifozëve të klubit, në lidhje me formën e Gareth Bale, që prej startit të sezonit.
Ndërkohë nga ana tjetër, qëndrimi i klubit është i ndryshëm për kapitenin e ekipit, Marcelo. Megjithëse braziliani ka luajtur shumë pak minuta këtë sezon, presidenti Perez raportohet se do të respektojë vendimin e mbrojtësit mbi të ardhmen e tij, cilido qoftë ai.
Mariano Diaz, Luka Jovic dhe Eden Hazard janë në qëndër të planeve të trajnerit Ancelotti, por Los Blancos janë të hapur ndaj një oferte të majme, nëse një nga klubet “big” të Europës insiston të bëjë të vetin kartonin e njërit prej lojtarëve.
Ndërsa përsa i përket afrimeve potenciale në janar, presidenti Perez është skeptik. Drejtuesit e klubit spanjollë nuk shikojnë lojtarë kualitativë që mund të bëhen pjesë e madrilenëve në mes të sezonit. Real është i interesuar në shërbimet e Kylian Mbappe dhe Antonio Rudiger, por kontrata e të dyve skadon në fund të sezonit. Si PSG, ashtu dhe Chelsea nuk janë të gatshëm të diskutojnë për një marrëveshje këtë merkato, dhe në të njejtën kohë, Real nuk ka financat e duhura për një operacion të tillë, në këtë moment.
