Karim Benzema do të largohet nga Real Madrid, pas 14 viteve spektakolare me gjigandët spanjollë. Francezi do të largohet në fund të sezonit, teksa kontrata e tij aktuale me galaktikët është në përfundim. Kjo do të thotë se Benzema mund t’i bashkohet cilido klubi, dhe duket se bomberi ka pranuar një ofertë marramendëse nga Al-Ittihad në Arabi. Ky lajm është bërë i ditur nga gazetari spanjoll Guillem Balague.
Carlo Ancelotti, i cili priste që Benzema të luante dhe sezonin e ardhshëm me Real Madrid, u shpreh:
“Benzema ka qënë një shembull i sjelljes së mirë dhe profesionalizmit, dhe ka përfaqësuar vlerat e klubit tonë. Ai ka fituar të drejtën të vendosë vet mbi të ardhmen e tij.”
Por largimi i Benzema nuk ishte i vetmi tek Real Madrid gjatë këtyre ditëve. Eden Hazard dhe Marco Asensio gjithashtu do të lënë klubin, dhe duket se për madrilenët do të startojë një epokë e re. Kujtojmë se Benzema ndërkohë ka fituar plot 25 trofe madhorë me Real Madrid, që prej vitit 2009 kur iu bashkua Los Blancos. Mes tyre, 5 Champions League-a dhe 4 tituj kampion në La Liga.
Në një deklaratë zyrtare për mediat, Real Madrid gjithashtu komentoi largimin e superstarit francez:
“Madrilenët dhe fansat në të gjithë botën kanë shijuar futbollin e tij unik dhe magjik, që e ka bërë atë një nga legjendat e klubit tonë, dhe një nga legjendat e futbollit botëror. Real Madrid është dhe do të jetë gjithmonë shtëpia e tij, dhe i urojmë atij dhe familjes së tij më të mirën në këtë fazë të re të jetës së tij.”
Përsa i përket zëvëndësuesit të tij potencial, një ndër emrat më të përmendur të momentit është anglezi Harry Kane. Megjithatë, ende është herët për të folur mbi një interesim konkret të madrilenëve.
