Pas lëvizjes së bujshme drejt PSG, e ardhmja e Leo Messit duket se është në dyshim. Gjatë javës së fundit janë shtuar gjithnjë e më shumë zërat, që flasin për një rikthim të mundshëm të tij në Barcelonë.
Para pak javësh ishte vet argjentinasi që nuk e përjashtoi mundësinë e rikthimit, por Leo po fliste për rolin e një drejtuesi sportiv. Por tani, duket se Messi mund t’i ribashkohet katalanasve si lojtar.
Sipas prestigjozes Marca, kandidati për postin e presidentit të Barcelonës, Victor Fonte, po shtyn përpara idenë se katalanasit duhet të rikthejnë në ekip, 6 herë fituesin e Topit të Artë. Fonte foli për radion Catalan, duke shprehur dëshirën e tij, për të parë dhe një herë Leon me fanellën blaugrana:
“Largimi i tij duhej të bëhej nga dera kryesore. Që prej atij momenti, klubi duhej të mendonte për rikthimin e Messit në Barcelonë, në vitin 2023.”
Aventura e argjentinasit në Paris nuk po shkon ashtu si ai do donte. Messi është aktivizuar në vetëm 7 nga 17 ndeshjet që PSG ka zhvilluar këtë sezon. Një dëmtim në gju e ka lënë jashtë fushës lojtarin, por ky nuk është i vetmi problem i Leo te parizienët. Ish-futbollisti i Barcelonës iu bashkua një skuadre të mbushur plot me yje si Kylian Mbappe, Neymar, Di Maria etj. Kjo do të thotë se Messi duhet të ndajë tashmë rolin e protagonistit me shokët e tij të ekipit. Në takimet që ai është aktivizuar, sidomos në kampionat, nuk është vënë re ndonjë kimi e veçantë mes tij dhe shokëve të skuadrës.
Për më shumë, trajneri i PSG, Pochettino, e ka vendosur argjentinasin në krahun e djathtë të mesfushës, një pozicion i ri për lojtarin. Të gjitha këto, mund të kontribuojnë si arsye të mundshme, për një rikthim në Barcelonë, në rast se rrethanat e mundësojnë këtë gjë.