Trajneri i Romës, Jose Mourinho, nuk i kurseu fjalët e mira për Tammy Abraham, pas fitores 3-0 të ekipit të tij ndaj Monza. Ky ishte një 3-pikësh mjaft i rëndësishëm për ekipin, që kryeson tashmë renditjen e Serie A. Pavarësisht se golat e fitores u shënuan nga Paulo Dybala (dopietë) dhe Roger Ibanez, ishte Tammy Abraham ai që fitoi lëvdatat e teknikut portugez. Në përfundim të ndeshjes, Mourinho u shpreh:
“Me lejen tuaj, dua të flas për dikë që nuk askush nuk po flet sot: Tammy Abraham. Sot ai ishte Tammy im. Ai luajti ashtu si doja unë. Fitoi gjithçka, mbajti topin nën kontroll, krijoi hapësira, fitoi topat e parë dhe na dha një opsion për t’i shtyrë ata (kundërshtarët) prapa. Ne gjithmonë flasim për sulmuesit kur ata shënojnë, dhe sot ishte padyshim nata e Paulo, por Tammy ishte fantastik.”
Sulmuesi argjentinas, Paulo Dybala, iu bashkua ekipit të Jose Mourinho me kosto zero gjatë merkatos verore, pas përfundimit të kontratës me Juventus. Argjentinasi u zëvëndësua nga Mourinho 25 minuta përpara përfundimit të sfidës ndaj Monza. “The Special One” e justifikoi vendimin e tij me faktin se i duhet të menaxhojë mirë sulmuesin, duke marrë shkas nga eksperienca e kufizuar sezonin e kaluar, për shkak të dëmtimeve. Portugezi komentoi:
“Kur ai (Dybala) doli jashtë fushës më tha, ‘Bos, nëse do më lije të vazhdoja do të kisha shënuar të tretin.’ Unë i thashë: ‘Mund ta shënosh përballë Udinese…’ Është e rëndësishme ta menaxhojmë situatën si duhet sepse Dybala ka pasur pak fat të keq me dëmtimet në të kaluarën, dhe nuk luajti shumë sezonin që lamë pas. Momentalisht nivelet e tij fizike po përmirësohen. Për ne ai është i jashtëzakonshëm, dhe mund ta shoh që tani se çfarë do të ndodhë në Qatar. Mbase trajneri i Argjentinës duhet të na ofrojë një shishe verë…”