Trajneri i Barcelonës, Ronald Koeman, ka kritikuar tifozët që sulmuan makinën e tij, pas humbjes në El Clasico. Katalanasit humbën 2-1 përballë Real Madrid dhe presioni është më i lartë se kurrë mbi teknikun hollandez. Por skenat në përfundim të ndeshjes ishin shokuese dhe të pajustifikuara.
Një grupim fansash të inatosur i prenë rrugën makinës së Koeman, i cili po largohej nga Camp Nou në përfundim të sfidës. Numri 1 i pankinës së blaugranave deklaroi se nuk ka zgjidhje për personat që mendojnë se dhuna është e justifikueshme. Hollandezi komentoi:
“Për mua është diçka që nuk ka zgjidhje. Personalisht mendoj se është një problem social. Ata (tifozët e dhunshëm) janë “Culés” ose njerëz, që kanë probleme me edukimin. Ata nuk e dinë se çfarë janë normat dhe vlerat.”
Trajneri gjithashtu shtoi:
“Mund të duket se kjo më ndodhi vetëm mua, por ishte e njejta situatë me lojtarë të tjerë dhe familjet e tyre. Duhet të gjejmë një zgjidhje.”
Gjithsesi, Koeman vlerësoi tifozët besnikë të katalanasve në stadium, për atmosferën që krijuan në ndeshjen me Real. Tekniku tha:
“Po përmirësohemi. Nuk duhet të shohim rezultatin, pavarësisht se e kuptoj zhgënjimin e humbjes ndaj Madrid. Dua të shijoj atmosferën e krijuar në stadium, por e di se gjërat varen nga rezultatet. Loja u vendos nga detajet dhe nuk e meritonim të humbisnim. Nuk patëm fat.”
Pavarësisht zhgënjimit të katërt rradhazi në El Clasico, Barcelona u shfaq si një skuadër e fortë dhe solide në fushë, dhe pati rastet e veta për shënim. Të rinjtë në ekip shfaqën profesionalizëm përballë një kundërshtari mjaft të fortë, gjë që i jep besim Koeman në këtë periudhë të vështirë.
Mbetet të shohim nëse Laporta ka rezervuar plane afatgjata për teknikun hollandez, apo Barcelona do të zëvëndësojë Ronald në momentin që do t’i ofrohet një mundësi më e mirë.