Sipas burimeve të Football Insider, Real Madrid po planifikon një ribashkim të bujshëm në janar me superstarin e Manchester United, Cristiano Ronaldo. Gjigantët spanjollë besojnë se ardhja e Ralf Rangnick në krye të stolit të “Djajëve të Kuq”, ka krijuar një mundësi potenciale për rikthimin e CR7 tek ekipi i tij i vjetër, në merkaton e janarit.
Burimi pranë Football Insider ka thënë se Real, po monitoron situatën e Cristiano Ronaldos tek United, dhe mund të bëjë një lëvizje konkrete nëse rrethanat janë të duhurat. Ndërkohë, në kampin e anglezëve, ka një besim se lojtari portugez më i mirë i të gjitha kohërave, është i papërshtatshëm për modelin e lojës së Ralf Rangnick. Kjo pasi trajneri gjerman preferon një lojë me presing dhe energji të lartë, dhe Ronaldo, tashmë 36 vjeç, i ka të limituara mundësitë fizike.
Që në ndeshjen e parë të Rangnick në krye të United, statistikat e vrapimit dhe sprintit të lojtarëve ishin menjëherë më të larta, në krahasim me ndeshjet e kaluara. Ky ishte një tregues i qartë i idesë së teknikut për të ardhmen e “Djajëve”.
Ronaldo u largua për herë të parë nga Manchester United, në vitin 2009, duke iu bashkuar Real Madrid. Portugezi kaloi një aventurë 9 vjeçare me plot suksese në Spanjë. Ai arriti të shënojë plot 450 gola në 438 ndeshje me Los Blancos. CR7 iu bashkua përsëri Manchester United në verë, pasi klubi luftoi fort me rivalët e Manchester City për kartonin e lojtarit. Futbollisti nënshkroi një kontratë dyvjeçare me klubin, e vlefshme deri në verën e vitit 2023. Por tani, duket se gjërat mund të ndryshojnë.
Ronaldo mund të bindet për një rikthim në Madrid, dhe nga trajneri Carlo Ancelotti. Bashkëpunimi i tyre i mëparshëm tek galaktikët ka rezultuar i suksesshëm, dhe Ronaldo është ende i uritur për trofe.