Erik ten Hag ka thënë se aventura e re në krye të Manchester United nuk përbën rrezik për reputacionin e tij si trajner. Hollandezi u shfaq mjaft konfident në intervistën e tij të parë si tekniku i “Djajëve të Kuq”, teksa gjithashtu zbuloi disa detaje mbi lojtarët dhe ndryshimet që ekipi mund të pësojë sezonin e ardhshëm. Ten Hag deklaroi:
“Unë nuk e shoh stolin e United si një rrezik. Mendoj se ky klub ka një histori të madhe, dhe tani duhet të krijojmë të ardhmen.”
Ish-tekniku i Ajax sqaroi dhe një herë situatën e Cristiano Ronaldos në klub. Ky i fundit është përfolur disa herë për një largim të mundshëm, por duket se do të qëndrojë në Old Trafford dhe këtë sezon. Ten Hag tha se pret gola nga portugezi, duke implikuar se CR7 nuk do të largohet. Në lidhje me lojtarët e tjerë trajneri vendosi të komentojë në mënyrë të përgjithshme, duke mos dhënë shumë detaje. I pyetur për rolin e Harry Maguire si kapiten i ekipit, hollandezi tha:
“Sezoni i ardhshëm është diçka tjetër, por ai bëri një punë mjaft të mirë këtë vit. Mendoj se është një lojtar fantastik që ka arritur shumë dhe më pëlqen të punoj me të.”
Rikthimi i United në elitën e futbollit europian do të jetë një mision padyshim i vështirë, por trajneri i ri i “Djajëve të Kuq” ka pranuar sfidën me pozitivitet:
“Plani është i madh dhe koha është e shkurtër. Dua vërtet shumë të punoj me këta lojtarë. Sezonin e kaluar skuadra e mbylli në vend të dytë, që do të thotë se potenciali është i madh. Mendoj se nëse përmirësohemi, nëse punojmë së bashku, mund të marrim më shumë sesa rezultati që morrëm këtë sezon.”