Presidenti i Barcelonës, Joan Laporta, ka folur dhe një herë mbi largimin e Leo Messit nga klubi në verë. Gjithsesi kësaj rradhe, deklarata e spanjollit ka qënë disi e çuditshme, duke ngjallur reagime nga opinioni publik.
Laporta tha se shpresonte që Messi do të qëndronte tek Barcelona, dhe do të luante falas, pra pa përfitime financiare. 34 vjeçari iu bashkua Paris St-Germain gjatë merkatos verore, pasi Barcelona nuk mund të përmbushte kushtet financiare të përcaktuara nga La Liga. Argjentinasi, i cili fitoi 10 kampionate në Spanjë me katalanasit, duhej të largohej pavarësisht se pranoi një përgjysmim page, nga ajo që parashikonte kontrata e tij fillestare.
Ndërkohë Laporata tha:
“Ishte një zhgënjim i madh nga të dyja palët. Shpresoja se Messi do të bënte një kthesë të madhe, dhe do të pranonte të luante falas për klubin. Mua do të më pëlqente dhe do ta mbështesja. Mesa kuptova, dhe La Liga do ta pranonte këtë gjë. Por, nuk mund t’i kërkonim një lojtari si Messi që ta bënte këtë gjë.”
Presidenti i Barcelonës përsëriti dhe një herë se rinovimi me Messin ishte gati i pamundur. Edhe në qoftë se do të bëhej realitet, kjo gjë do ta vendoste klubin në një rrezik shumë të madh financiar. Laporta gjithashtu komentoi në lidhje me raportin e tij të tensionuar me trajnerin Ronald Koeman. Duket se palët kanë arritur në një marrëveshje, të paktën provizore, përsa i përket kontratës së hollandezit.
Laporta deklaroi:
“E pyeta atë (Koeman) nëse kishte ende besim tek skuadra dhe ai më tha: ‘Sigurisht që kam besim. Më duhet të rikthej në lojë lojtarët e dëmtuar.’, Koeman do të vazhdojë me çdo kosto, për të treguar se Barcelona aktuale është një ekip kompetitiv.”
Nga komentet e fundit të Laportës, kuptohet se Koeman mund t’i besohet skuadra, dhe për pjesën e dytë të sezonit.
