Kylian Mbappe ka bërë për herë të parë publike, bisedimet që zhvilloi me klubin e tij gjatë verës, në lidhje me të ardhmen. 22 vjeçari tha se në atë kohë, i komunikoi PSG dëshirën për t’u larguar, pavarësisht se lëvizja e shumëpritur drejt Real Madrid dështoi edhe këtë merkato.
Sulmuesi francez ka kritikuar klubin e tij për mënyrën sesi u soll gjatë muajve të verës, duke insistuar se ia kishte bërë mjaft të qartë bordit drejtues dëshirën e tij për të shkëputur kontratën me parizienët. Madrilenët e Real ndërkohë, ishin në gjendje të paguanin plot 197 milionë paundë për sulmuesin, por PSG refuzoi transferimin, pavarësisht se Mbappes i mbaron kontrata në fund të sezonit. 22 vjeçari tha për RMC Sport:
“Kërkova që të largohesha. Në atë moment nuk kisha dëshirë që të rinovoja kontratën time. Doja që klubi të vendoste një çmim të mirë në mënyrë që të gjenin një lojtar tjetër me kualitet. PSG është një klub që më ka sjellë shumë. Kam qenë gjithmonë i lumtur, në 4 vitet e qëndrimit këtu, dhe ende jam. Doja që të gjithë të dilnim nga kjo gjë më të fortë, dhe të arrinim në një marrëveshje. U thashë se nëse nuk duan që të iki, do të qëndroj.”
Mbappe do të ketë mundësinë të lidhë një para-kontratë me klubin që ai dëshiron në muajin janar. Lojtari gjithashtu ka hedhur poshtë lajmet se ka refuzuar 6 apo 7 herë rinovimin me PSG, duke mos pranuar të takojë drejtorin sportiv Leonardo:
“Kjo nuk është aspak e vërtetë. Ata (klubi) më thanë të flisja me presidentin. Nuk më pëlqeu fakti që drejtuesit thanë se u paraqita dëshirën për largim, javën e fundit të gushtit. Këtë gjë ua komunikova që në fund të korrikut.”
Ndërkohë, drejtori sportiv Leonardo deklaroi se është besimplotë se Mbappe, do të nënshkruajë një kontratë të re me PSG shumë shpejt.