Mesfushori i Manchester United, Paul Pogba, ka bërë së fundmi një deklaratë që ka lënë të habitur opinionin sportiv. Francezi tha se gjatë kohës që Jose Mourinho ishte trajner i Manchester United, ai kaloi një gjendje depresioni, si pasojë e marrëdhënies të vështirë me portugezin.
Mourinho u shkarkua nga roli i trajnerit të “Djajëve të Kuq” në dhjetor të vitit 2018. Gjatë kohës së tij në Manchester, Pogba humbi rolin e zëvëndës-kapitenit, si dhe shpesh herë u la në stol për shkak të mosmarrëveshjeve me “The Special One”. Në një intervistë të fundit për La Figaro, ai u shpreh:
“Kam përjetuar depresion disa herë në karrierën time, por nuk kam folur për të. Shpesh herë nuk e di kur kur je në depresion, do thjesht të izolohesh nga të tjerët, të jesh vetëm, dhe këto janë shenja që nuk gënjejnë. Personalisht, për mua gjithçka filloi me Jose Mourinhon në Manchester. Fillon të pyesësh veten nëse është faji yt, pasi nuk ke kaluar asnjëherë momente të tilla në jetë.”
Pogba iu ri-bashkua United në vitin 2016 për shifrën rekord prej 89 milionë paundë. Në të njejtin vit Jose Mourinho mori drejtimin e skuadrës pas largimit të hollandezit Louis van Gaal. Portugezi ndihmoi United të fitonte League Cup dhe Europa League në vitin 2017, por marrëdhënia e tij me klubin u përkeqësua sezonin e rradhës.
Mediat angleze në atë kohë raportuan se Mourinho i kishte komunikuar Pogba se ai nuk do të ishte më kurrë kapiteni i Manchester United, për shkak të problemeve në sjellje të francezit. Vetëm 2 muaj më vonë drejtuesit e klubit shkarkuan trajnerin për shkak të rezultateve të dobëta.
Pogba u shpreh se bisedat me lojtarë të tjerë dhe familjen e tij, e ndihmuan të kalonte këtë periudhë të vështirë.
