Mbrojtësi i Francës dhe Manchester United, Raphael Varane, ka thënë se situata mes Cristiano Ronaldos dhe klubit po ndikon tek lojtarët e tjerë. Në një intervistë televizive, CR7 u shpreh se ndihet i tradhëtuar nga klubi, nuk e respekton trajnerin Erik ten Hag, si dhe po i bëhet presion që të largohet nga United. Klubi ndërkohë tha se do të reagojë me një deklaratë zyrtare, pasi të ketë sqaruar të gjitha faktet.
Varane ndërkohë shprehu komentin e tij mbi situatën. Mbrojtësi deklaroi për Europe1:
“Sigurisht që ndikon dhe tek ne. Po ndjekim se çfarë po ndodh dhe çfarë po thuhet. Jemi munduar të qetësojmë situatën në mënyrën tonë, dhe të mos përfshihemi shumë në të. Ajo që ndodh në klubet e mëdha merr shumë vëmendje në media. Kur bëhet fjalë për një yll si Ronaldo, akoma dhe më shumë, prandaj mundohemi të ruajmë distancën…”
Varane shtoi:
“Ajo që unë dua është më e mira për ekipin, kështu që çfarëdo të ndodhë në fund, ne si lojtarë do ta pranojmë dhe do të vazhdojmë të japim më të mirën tonë.”
Ronaldo refuzoi të futej në lojë si zëvëndësues në minutat e fundit, në ndeshjen përballë Tottenham Hotspur në 19 tetor, dhe drejtuesit e klubit ishin të qartë në mbështetjen e tyre për trajnerin Ten Hag në këtë episod. Më pas, sulmuesi portugez nuk u përfshi në sfidën e rradhës përballë Chelsea.
Intervista e fundit e CR7 ka ndarë dhe tifozët e “Djajëve të Kuq” në 2 grupime, disa mbështesin portugezin në deklaratat e tij, ndërkohë që të tjerë i kanë konsideruar të papranueshme komentet e Ronaldo. Gjithsesi, sipas të gjitha gjasave sulmuesi do të largohet nga Manchester United në janar, pas mbylljes së Kupës së Botës, pavarësisht se ende nuk dihet se cili mund të jetë destinacioni i tij i ardhshëm.
