Dusan Vlahovic ka thënë se vendimi për të zgjedhur Juventus në vend të Arsenal, si destinacionin e tij të rradhës, ka qënë mjaft i lehtë. Përpara transferimit në Torino, sulmuesi serb ishte një nga objektivat kryesorë të trajnerit të Arsenal, Mikel Arteta. Por ish-lojtari i Fiorentinës vendosi t’i bashkohej “Zonjës së Vjetër”, në një marrëveshje që kapi shifrën e 58 milionë paundëve.
22 vjeçari, i cili shënoi 20 gola për Fiorentinën gjatë pjesës së parë të sezonit, ka nënshkruar një kontratë 4 vjeçare me Juventus. Gjatë prezantimit të tij, Vlahovic dha komentet e para për aventurën e re. Serbi deklaroi:
“Jam i emocionuar dhe krenar që kam firmosur me Juventus. Jam gati të jap gjithçka për këtë klub të madhërishëm për të arritur objektivat e tij. Kishte shumë thashetheme për klube të huaja, por zgjedhja ishte e lehtë sepse Juventus dhe unë kemi të njejtën AND. Lufta dhe vuajtja atëherë kur duhet janë mentaliteti im, për këtë arsye vendimi për të ardhur këtu nuk ishte i vështirë.”
Vlahovic shtoi:
“Dua të falenderoj presidentin dhe të gjithë të tjerët që e bënë këtë lëvizje të mundur. Fola me Federico Chiesan përpara se të merrja këtë vendim. Kemi qënë shokë skuadre tek Fiorentina. Më vjen shumë keq që ai është i dëmtuar, por do të presim rikthimin e tij. Dua të falenderoj të gjithë te Fiorentina që më ndihmuan të maturohesha, dhe të bëhesha ky lojtar që jam sot. Të jesh një model për të tjerët në moshën 22 vjeçare është e çuditshme. Jam ende i ri dhe nuk e kam marrë veten nga ajo që po ndodh rrotull meje”
Shpesh herë Vlahovic është cilësuar si një nga talentet e reja më premtuese në arenën europiane të futbollit. Sulmuesi është krahasuar me Kylian Mbappe dhe Erling Haaland, por në daljen e tij për shtyp ai tha se do të ndjekë rrugën e tij.