Trajneri i Barcelonës, Xavi Hernandez, ka pranuar se ende nuk e di nëse Frenkie de Jong do të qëndrojë tek Barcelona në prag të sezonit të ri. Deklarata e Xavit vjen pasi presidenti i Barcelonës, Joan Laporta, i dha shpresë Chelsea dhe Manchester United se mund të sigurojnë një marrëveshje për shërbimet e hollandezit.
Por pavarësisht se gjigandët e Premier League kanë shprehur interes për mesfushorin e talentuar, ky i fundit nuk dëshiron të largohet nga Barcelona. Një prej arsyeve është fakti se Barça është klubi i ëndrrave për De Jong, dhe lojtari kërkon të zhvillojë karrierën e tij tek gjigandët spanjollë. Një tjetër arsye është fakti se Barcelona ka detyrime të konsiderueshme në paga të papaguara ndaj futbollistit, dhe mesfushori nuk dëshiron të largohet pa zgjidhur më parë këtë çështje.
25 vjeçari bëri debutimin e tij të parë në fazën përgatitore të klubit, në fitoren 2-0 të Barcelonës ndaj New York Red Bulls. Xavi u pyet pas ndeshjes për spekullimet që kanë shoqëruar De Jong në javët e fundit të merkatos. Ish-mesfushori i Barcelonës u shpreh:
“Nuk e di nëse ai do të qëndrojë, ka ende kohë dhe shumë gjëra mund të ndodhin. Për momentin ai është pjesë e skuadrës si gjithë të tjerët.”
De Jong ndërkohë u rikthye në rolin e tij natyral si mesfushor në ndeshjen e fundit, pasi lojtari ishte aktivizuar në pozicionin e mbrojtësit në takimet e mëparshme. Xavi u pyet nëse ky ndryshim ishte një shenjë se De Jong është drejt largimit. Spanjolli shtoi:
“Nuk ka nevojë të dërgoj sinjale në fushë, mund të flas në mënyrë direkte me futbollistët e mi.”
Manchester United mbeten favoritët kryesorë për të përfituar kartonin e De Jong, teksa “Djajtë e Kuq” janë linkuar vazhdimisht me emrin e ish-lojtarit të Ajax.
