Juventus duket se shumë shpejt do të hidhet në veprim për të siguruar shërbimet e mesfushorit të Manchester City, Kalvin Phillips. Ky i fundit ka luajtur shumë pak në ekipin e trajnerit Pep Guardiola, dhe duket se situata nuk do të ndryshojë në Etihad. Kjo është dhe arsyeja që mund të shtyjë anglezin të largohet që në merkaton e janarit nga klubi i tij. Këtu hyn në lojë dhe Juventus, që është duke monitoruar situatën.
Momentalisht, “Zonja e Vjetër” po konsideron mundësinë e një transferimi në formë huazimi, pasi ky mund të jetë opsioni i preferuar dhe për vet Kalvin Phillips. Lojtari duhet të bëjë një zgjedhje në janar, duke marrë parasysh dhe dëshirën e tij për të luajtur në europianin e ardhshëm me kombëtaren angleze. Trajneri Southgate i ka besuar vazhdimisht Kalvin Phillips vendin e titullarit, por me kaq pak minuta në fushën e blertë me klubin e tij, mesfushori rrezikon të humbasë vendin e titullarit dhe tek “3 Luanët”.
Kujtojmë se Kalvin Phillips erdhi në Etihad na skuadra e Leeds për shifrën e 43 milionë paundëve. Gjatë verës lojtari ishte mjaft insistues për planet e tij për të rifituar besimin e trajnerit Pep Guardiola. Megjithatë, gjatë këtij sezoni Phillips ka luajtur vetëm 216 minuta gjithsej, teksa është aktivizuar vetëm 8 herë me fanellën e City.
Ajo që dihet me siguri është fakti se drejtuesit e City do të lënë vet Kalvin Phillips të vendosë të ardhmen e tij, ashtu si kanë bërë dhe me lojtarë të tjerë gjatë merkatove të kaluara. Juventus ndërkohë ka një mesfushë relativisht të kompletuar, me lojtarë si Weston McKennie, Miretti, Rabiot apo Locatelli. Megjithatë, trajneri Allegri e di mjaft mirë se një lojtar si Kalvin Phillips do t’i jepte një tjetër energji mesfushës së tij, në një moment mjaft të rëndësishëm për Juventus, që është në një garë të ashpër me Inter për titullin kampion në Serie A.
