Milan ka mposhtur Inter në një ndeshje mjaft të rëndësishme, me emocione dhe spektakël. Kuqezinjtë arritën të përmbysin avantazhin 1-0, duke arritur një fitore që sipas të gjitha gjasave do të ketë peshë të madhe në garën për titullin kampion në Serie A.
Ishte pikërisht Inter që kaloi i pari në avantazh me golin e Marcelo Brozovic në minutën e 21’ të pjesës së parë. Por goli i barazimit nuk do të vononte, teksa vetëm 7 minuta më vonë, Conceição Leão vendosi baraspeshën në fushë për Milan, pas pasit të bukur të Tonali. Pjesa e parë u mbyll në shifrat 1-1, teksa skuadrat po luanin pak a shumë në të njejtin nivel.
Në pjesën e dytë të takimit, aksionet e vazhdueshme të Milan u shpërblyen me gol, teksa këtë rradhë Leao asistoi Giroud, i cili në minutën e 54’ të takimit nuk gaboi para portës. Portugezi do t’i vinte vulën paraqitjes së tij fantastike në minutën e 60’, duke shënuar golin e tretë për Milan, që i dha qetësi kuqezinjëve.
Pak minuta më vonë, Edin Dzeko arriti të gjejë rrugën e rrjetës për Inter, duke rikthyer në lojë zikaltërit, por Milan ia doli të administrojë mjaft mirë rezultatin, dhe shifrat nuk ndryshuan deri në fund të takimit. Kuqezinjtë ndodhen tashmë në vendin e dytë në renditjen e Serie A, me pikë të barabarta me Napolin, që mban vendin e parë për shkak të golavarazhit më të mirë.
Inter ndërkohë gjendet në vendin e gjashtë, me 9 pikë të grumbulluara deri më tani. Kjo ishte humbja e dytë në 5 ndeshje e ekipit të Simone Inzaghi, që ka pikë të barabarta me Juventus. Zikaltërit mund të konsiderohen deri diku të pafat në këtë sfidë, duke qënë se portieri i Milan, Mike Maignan, bëri disa pritje spektakolare, për t’i refuzuar Inter marrjen e 1 pike në derbi.