Trajneri i Manchester United, Ole Solskjaer, i ka kërkuar Gareth Southgate, që të mos përfshijë Mason Greenwood, në emrat e lojtarëve të grumbulluar për kualifikueset e Botërorit 2022. Kjo kërkesë kuptohet se vlen vetëm për ndeshjet e ardhshme. 19 vjeçari nuk është aktivizuar me kombëtaren që prej vitit të kaluar, pasi theu rregulloren e Covid 19 dhe u dërgua në shtëpi.
Gjithsesi, këtë sezon me Manchester United, Greenwood ka shfaqur një formë mjaft të mirë, duke arritur të shënojë 3 gola në 5 ndeshje. Megjithatë, kjo nuk është arsyeja e vetme se përse Solskjaer nuk dëshiron që Greenwood të shkëputet me kombëtaren. Motivet e teknikut norvegjez ende nuk janë shumë të qarta, por nga ajo që është përflitet, Ole është i shqetësuar për presionin e tepërt dhe ngarkesën e lojtarit, dhe nuk dëshiron që kjo gjë të ndikojë negativisht në paraqitjet e tij në fushë. Kjo është dhe arsyeja që sipas Daily Mail, trajneri i “Djajëve të Kuq” ka ndërhyrë personalisht për të penguar grumbullimin e lojtarit nga Southgate.
Ky i fundit ishte i prirur të thërriste përsëri në skuadër Greenwood dhe Phil Foden. Lojtari i Manchester City gjithashtu u dërgua në shtëpi pasi theu protokollet e Covid 19 shtatorin e kaluar, duke mirëpritur vizitorë në dhomën e tij në hotel.
Situata në lidhje me Greenwood bëhet akoma më e komplikuar pas interesit të kombëtares xhamajkane. Prindërit e lojtarit janë me origjinë xhamajkane dhe kjo gjë i jep Greenwood mundësinë për të veshur dhe fanellën e kësaj kombëtareje, nëse dëshiron. Sigurisht, askush nuk do të donte të largohej nga kombëtarja angleze për shkak të nivelit elitar të saj, por nëse sulmuesi nuk gjen hapësira ose nuk grumbullohet nga “3 Luanët”, kjo gjë mbetet një rrezik real.
Gjithsesi, momentalisht kjo gjë nuk është një problem. Lojtari dhe familja e tij kanë siguruar federatën angleze të futbollit se është i fokusuar te kombëtarja e Anglisë. Për ta, rikthimi i lojtarit të United në skuadrën e “3 Luanëve” është thjesht një çështje kohe. Trajneri Southgate gjithashtu e konsideron Greenwood një sulmues “senior”, pra të ekipit të parë. Kjo gjë është mjaft pozitive pasi lojtari nuk do të jetë më i vlefshëm për grumbullimet e ekipit U21, por do të konsolidojë dalëngadalë rolin e tij në kombëtaren e parë.
Ndërkohë Anglia do të përballet me Andorrën dhe Hungarinë në 2 ndeshjet e ardhshme të vlefshme për kualifikueset e Botërorit të Katarit. Në dukje sfidat janë të lehta, por “3 Luanët” nuk duan kurrsesi të rrezikojnë pozitat e tyre, në një grup ku gjendet dhe Polonia, që ka në skuadrën e saj fituesin e Këpucës së Artë, Robert Lewandowski. Në kualifikueset europiane të Botërorit, vetëm skuadra kryesuese e grupit kualifikohet direkt, ndërsa vendet e dyta do t’i drejtohen playoff-eve. Anglia e Southgate duhet të lërë pas zhgënjimin e finales së Euro 2020, ku u mund në finale nga Italia dhe nuk arriti të ngrejë dot trofeun. Gjithsesi, tekniku i “3 Luanëve” nuk e ka humbur aspak besimin tek lojtarët e tij.
