Sulmuesi i Tottenham, Son Heung-min, ka siguruar tifozët se nuk do t’i mungojë kombëtares koreane në botërorin e Katarit. Lojtari vuajti një frakturë në syrin e majtë, në sfidën e Tottenham përballë Marseille të vlefshme për Champions League. Dëmtimi nuk u duk shqetësues në fillim, por pasi lojtari iu nënshtrua operacionit, mediat sportive në Angli vunë në dyshim aktivizimin e tij me Korenë e Jugut në Kupën e Botës.
Gjithsesi, vet Son ka qetësuar tifozët nëpërmjet një mesazhi në rrjetin social Instagram. Sulmuesi u shpreh:
“Nuk do ta humbisja këtë (botërorin) për asnjë gjë. Mezi po pres të përfaqësoj vendin tone të bukur. Doja të merrja një moment për të falenderuar të gjithë ju për mesazhet e suportit që kam marrë gjatë kësaj jave. Kam lexuar kaq shumë prej tyre, dhe vërtet i vlerësoj të gjitha. Në një kohë mjaft të vështirë kam marrë shumë suport prej jush. Të luash për vendin tënd në Kupën e Botës është një endërr e shumë fëmijëve, ashtu ka qënë dhe për mua.”
Botërori i Katarit do të startojë në 20 nëntor, ndërkohë që Koreja e Jugut do të luajë takimin e parë në 24 nëntor, përballë Uruguait. Son ka shënuar vetëm 5 gola në 19 ndeshje këtë sezon për Tottenham. Megjithatë, sulmuesi ngelet një nga lojtarët më të rëndësishëm në ekipin e Antonio Contes. Tekniku italian gjithashtu komentoi mbi dëmtimin e Son, duke u shprehur i sigurtë se lojtari do të aktivizohet në Kupën e Botës. Conte tha:
“I dërgova atij (Son) një mesazh pas operacionit dhe Sonny ishte vërtet i dëshpëruar për situatën, por shpresoj se ai do të rikuperohet mirë dhe do të luajë në Botëror. Jam i sigurt, i sigurt, se ai mund të kthehet shpejt për Korenë e Jugut në Katar.”