Southampton është në bisedime me Chelsea, për të blerë përfundimisht kartonin e futbollistit shqiptar Armando Broja, i cili luan si i huazuar nga blutë e Londrës. Sulmuesi ka impresionuar me paraqitjet e tij, që prej mbërritjes në “St Mary Stadium”. Deri më tani, Broja ka shënuar 5 gola në Premier League që prej startit të sezonit, dhe trajneri Ralph Hasenhüttl është i bindur në potencialin e shqiptarit.
Mbetet për t’u parë nëse Broja është në planet afatgjatë të Chelsea, dhe situata duhet të qartësohet më shumë këtë javë. Kjo pasi Southampton e di mirë se lojtari ka kapur interesin e disa klubeve të tjera, dhe kjo gjë do të nxisë drejtuesit e Chelsea të marrin një vendim për Armando Brojën.
Sulmuesi, i cili shpenzoi sezonin e kaluar në huazim tek Vitesse në Hollandë, ka qënë një tifoz i zjarrtë i Chelsea që në fëmijëri. Kjo shpjegohet dhe me faktin se lojtari është një produkt i akademisë së klubit londinez. Broja bëri debutimin e tij si profesionist me Chelsea në vitin 2020, gjatë kohës kur skuadrën e drejtonte Frank Lampard. Kontrata e tij aktuale me klubin skadon në vitin 2026.
Brenda ambientit të Chelsea ekziston një perceptim se lojtarit do t’i jepet një shans, për të luftuar për një vend në ekipin e parë, nëse nuk arrihet një marrëveshje për transferimin e tij diku tjetër këtë muaj. Tifozët e ekipit dëshirojnë të njejtën gjë, teksa kanë qënë dëshmitarë sesi lojtarët e dalë nga akademia, janë shndërruar në superstarë të arenës europiane. Mes tyre mund të përmendim Mason Mount, Reece James, Trevoh Chalobah dhe Callum Hudson-Odo.
Sulmuesit e Chelsea nuk kanë qënë konsistentë me paraqitjet e tyre këtë sezon, dhe kjo gjithashtu mund të ndihmojë Brojën, në misionin për të luajtur rregullisht me londinezët.
