Gareth Southgate nuk mund të japë garancinë e tij, se Harry Maguire do të luajë në fazën në grupe të Euro 2020. Numri 1 i pankinës së “3 Luanëve” është shprehur skeptik mbi aktivizimin e mbrojtësit në fazën e parë të finaleve të Europianit. Maguire humbi dhe finalen e Europa League për shkak të dëmtimit delikat në ligamentet e kyçit.
Lojtari i Manchester United bën pjesë në listën e futbollistëve të grumbulluar nga Southgate, për Euro 2020, por tanimë duket se Gareth do t’i duhet të mendojë një model tjetër loje. Kjo pasi në dyshim për formën fizike nuk është vetëm Harry Maguire, por dhe Jordan Henderson. Ky i fundit sapo është rikuperuar nga një operacion delikat, pas një dëmtimi. Gjendja e Henderson ende mbetet jo optimale, për këtë arsye nuk dihet nëse talenti i Liverpool do të luajë në ndeshjen hapëse të Anglisë në Europian, përballë kombëtares kroate.
Trajneri anglez u shpreh për situatën aktuale:
“Të dy lojtarët (Maguire dhe Henderson) nuk janë aty ku duhet të jenë nëse flasim për ndeshjen me Kroacinë. Ne jemi realistë, por ata janë lojtarë të jashtëzakonshëm. Kur flasim për Maguire që nuk ka humbur asnjë ndeshje, dhe Henderson që bën të pamundurën të mundur, mbase mund t’ia dalin.”
Gareth Southgate gjithashtu shtoi:
“Nuk është si të riparosh një makineri, është trupi i njeriut.
Mund të pësosh probleme për arsye nga më të ndryshmet. Gjëja më e rëndësishme është të mos shtyjmë lojtarët përtej limitit të tyre. Kjo gjë do të ishte idiotësi dhe neglizhencë.”
Megjithëse rrethanat nuk po e ndihmojnë trajnerin Southgate, Anglia ka në organikën e saj talente të rinj mjaft premtues. Jude Bellingham është një prej tyre. 17 vjeçari i cili aktivizohet me Borussia Dortmund ishte një nga surprizat e listës provizore të Southgate, por tashmë, është në qendër të vëmendjes së analistëve dhe opinionit sportiv.