Sulmuesi brazilian i Real Madrid, Vinicius Junior, ka shprehur dëshirën e tij për të qëndruar tek galaktikët. Në prag të përballjes me rivalët e përbetuar të Atletico Madrid, lojtari u pyet përsëri mbi të ardhmen e tij dhe eksperiencën e deritanishme në Madrid.
Talenti i madrilenëve u pyet se çfarë çmimi do t’i vendoste kartonit të tij, por refuzoi të japë një përgjigje, duke thënë se dëshiron që të qëndrojë tek Real Madrid. Vinicius tha:
“Mendoj se është më mirë që të mos i vendos një çmim vetes. Është më mirë që të qëndroj këtu, në Madrid. Duhet të punoj fort që të fitoj Topin e Artë. Duhet të vazhdoj të luaj këtu, t’i bëj gjërat siç duhet dhe të jem gjithmonë në formën time më të mirë. Nëse vazhdoj të luaj kështu, sigurisht që mund t’a fitoj, por qëllimi im kryesor mbetet të fitoj tituj me shokët dhe për skuadrën.”
Sulmuesi është besimplotë se e ardhmja e tij tek gjigandët madilenë do të jetë e mbushur me trofe, sidomos nëse ai vazhdon me performancat e mira. Deri më tani këtë sezon, Vinicius ka shënuar 10 gola në 16 ndeshje të La Liga, dhe në të njejtën kohë, ka kontribuar me 2 gola dhe 4 asiste në Champions League.
Ndërkohë lojtari shfrytëzoi rastin, për të vlerësuar shokun e tij të skuadrës Karim Benzema, duke i thurrur elozhe francezit. Braziliani u shpreh:
“Benzema është një lojtar i jashtëzakonshëm, ai e bën çdo gjë të duket kaq e lehtë. Është gjithmonë në ndihmë të skuadrës dhe unë mundohem të jem në ndihmë të tij, sa herë që është e mundur.”
Vinicius ndërkohë tha se ka raste të caktuara që ndihet i lodhur nga aktivizimet e shumta, por nuk e humbet asnjëherë dëshirën dhe rastin, për të qënë titullar në ekipin e Los Blancos.