Përveç spektaklit që ka ofruar deri më tani, Euro 2020 është karakterizuar dhe nga dëmtimet e shumta të lojtarëve, disa prej të cilëve janë detyruar të mbyllin aventurën e tyre europiane. Fatkeqësisht, i tillë ka qenë fati dhe për Leonardo Spinazzola, mbrojtësin e kombëtares italiane.
Performancat e italianit kanë rënë në sy përgjatë fazës në grupe, por dhe në takimet direkte përballë Austrisë dhe Belgjikës. Megjithëse ekipi i Mancinit arriti të kualifikohej në gjysmëfinale, në një sfidë mjaft të vështirë përballë belgëve, Spinazzola ka marrë një dëmtim që mund ta lërë atë jashtë fushave të blerta për një kohë të gjatë. Sipas raportimeve, lojtari ka këputur tendinën e Akilit, dhe rruga drejt rikuperimit kërkon muaj.
Edhe në ndeshjen me Blegjikën, Spinazzola luajti rol kyç në performancën e italianëve, duke i shpëtuar dhe nga një gol i sigurtë i Lukaku, që mund të ndryshonte rrjedhën e lojës. Italiani u vendos në mënyrë instinktive në vijën fatale duke larguar devijimin e sulmuesit të Inter.
Ndërkohë, dhe në kampin spanjoll ka shqetësime përsa i përket dëmtimeve. Pablo Sarabia mund të mos jetë i gatshëm zbresë në fushë përballë Italisë në gjysmëfinale. Arsyeja është një dëmtim muskular. 29 vjeçari i cili aktivizohet me PSG u detyrua të linte fushën në çerekfinalen përballë Zvicrës, e cila u vendos vetëm pas goditjes së penalltive.
Sipas Diario AS, Sarabia kishte ndjerë shqetësime muskulare, që në 5 minutat e para të sfidës. Gjithsesi, lojtari injori shenjat duke u munduar të vazhdojë lojën, deri në mbylljen e pjesës së parë. Shkalla e dëmtimit ende nuk është e qartë dhe ekzaminime të tjera pritet të përcaktojnë gjendjen e Sarabia. Megjithatë, sipas të gjitha gjasave do të jetë Dani Olmo i cili do të zëvëndësojë lojtarin, në 11-shen startuese të spanjollëve përballë Italisë.