Club Brugge është kualifikuar në ndeshjet me eleminim direkt të Champions League, pas barazimit 0-0 në transfertë ndaj Atletico Madrid. Kjo është hera e parë në histori që ekipi belg kalon fazën në grupe të kompeticionit prestigjoz, teksa 10 përpjekjet e mëparshme kanë rezultuar të pasuksesshme.
18 herë kampionët e Belgjikës janë kështu të pamposhtur në grupin B, teksa kryesojnë me 10 pikë pas 4 takimeve. Brugge arriti fitore mbresëlënëse ndaj Porto, Bayer Leverkusen dhe Atletico Madrid, përpara se të ndalte këta të fundit në barazim, në transfertë. Të besuarit e Diego Simeone dominuan takimin, me 21 goditje në portë, përkundrejt 5 të miqëve. Gjithsesi, gjithçka u mbyll në barazim, dhe kjo do të thotë se Atletico, Porto dhe Bayer Leverkusen janë tashmë në një garë të ashpër për të siguruar biletën e fundit të kualifikimit.
Napoli nga ana tjetër vazhdon të befasojë me formën fantastike, si në kampionat, ashtu dhe në Europë. Italianët mposhtën përsëri Ajax, kësaj rradhe me rezultatin 4-2. Kjo do të thotë se napoletanët kanë siguruar tashmë vendin në fazën me eleminim direkt.
Të zotët e shtëpisë kaluan shpejt në avantazh, që në minutën e 4’ të takimit me Lozano. Goli ishte një pamje e qartë sesi do të vijonte loja, teksa Napoli gjeti golin e dytë vetëm 12 minuta më vonë me Giacomo Raspadori, i cili dërgoi topin në rrjetë me një goditje të bukur me të majtën.
Ajax arriti të shënojë me Klaasen në minutën e 49’, por hollandezët në asnjë moment nuk ishin në gjendje të mendonin për një përmbysje rezultati. Napoli shënoi golin e tretë në minutën e 62’ të sfidës, me anë të Khvicha Kvaratskhelia, i cili u tregua mjaft i saktë nga pika e penalltisë.
Miqtë gjithashtu shënuan nga pika e bardhë në minutën e 83’, por Osimhen shënoi dhe një herë tjetër për italianët në fund të takimit, duke vulosur shifrat përfundimtare 4-1.
