Sulmuesi veteran i kombëtares gjermane, Thomas Muller, është duke u përgatitur intensivisht për sfidën në Wembley Stadium përballë Anglisë. 31 vjeçari u hoq nga lista e lojtarëve të kombëtares përpara 2 viteve, por trajneri Joachim Löw, ndërroi mendjen përpara startit të Euro 2020, duke rikthyer në ekip lojtarin me mjaft eksperiencë. Muller pësoi një dëmtim në gju gjatë fitores 4-2 të gjermanëve përballë Portugalisë. Gjithsesi, ai u rikthye në fushë në 25 minutat e fundit me Hungarinë, dhe tashmë është gati për super-sfidën direkte me “3 Luanët”. Sulmuesi u shpreh për Xinhua News Agency në prag të sfidës:
“Jam totalisht gati që të jem i gatshëm në ndeshje. Me klubin tim (Bayern Munich) jam në një pozicion tjetër, krahasuar me atë në kombëtare. Me Gjermaninë e shikoj veten më shumë si forca suportuese që inicion raste për lojtarët e tjerë. Në kombëtare jam më shumë një asistues.”
Thomas gjithashtu komentoi mbi shancet e gjermanëve përballë ekipit të Southgate:
“Përballë Anglisë mendoj se nuk do të kemi shumë mundësi për shënim. Por, nuk shikoj ndonjë problem nëse e fitojmë përballjen dhe vetëm me 1 gol.
Skuadra duhet të jetë e vendosur deri në minutën e fundit. Nga sot gjithçka është për jetë a vdekje. Duhet të jesh i përgatitur dhe sa më fleksibël në lojë.”
Gjermani ka luajtur në 3 Kupa Bote për Gjermaninë, përkatësisht atë të 2010, 2014 dhe 2018. Gjithsesj në kompeticionin prestigjoz, Muller ka shënuar 10 gola. Mes tyre, 2 i ka shënuar pikërisht përballë Anglisë në vitin 2010. Në atë ndeshje, gjermanët fituan me rezultatin 4-1 duke avancuar përpara. Gjithsesi, në këtë sfidë, duket se ekuilibrat janë shumë më të balancuar mes dy përfaqësueseve.
Interesant është fakti se Muller nuk ka shënuar asnjë gol në Europianet që ka marrë pjesë. Por, siç e theksoi dhe vet, për të e rëndësishme dhe në plan të parë ngelet gjithmonë ecuria e skuadrës, dhe jo arritjet personale.
