Pas eleminimit të Gjermanisë nga Anglia në Euro 2020, mesfushori Toni Kroos ka vendosur t’i japë fund karrierës së tij me kombëtaren e “panzerave”. 31 vjeçari njoftoi fansat për vendimin e tij, nëpërmjet një postimi në rrjetet sociale. Lojtari bëri të ditur publikisht se kishte një kohë të gjatë që mendohej dhe tashmë e kishte marrë vendimin e tij. Mesfushori u bëri të ditur fansave se fokusi i tij tashmë do të jetë familja dhe Real Madrid.
Toni Kroos shkruajti në Twitter:
“Kam luajtur 106 ndeshje për Gjermaninë.
Toni Kroos
Nuk do të ketë një tjetër. Po shpresoja ta mbyllja me 109 ndeshje dhe me një tjetër trofe madhor, atë të Europianit, dhe dhashë gjithçka për ta bërë këtë të mundur. E kisha vendosur prej kohësh se ky kompeticion do të ishte i fundit për mua. E dija prej kohësh se nuk do të isha pjesë e skuadrës (Gjermanisë) për Qatar 2022, pasi dua të jem i fokusuar tek familja ime dhe objektivat me Real Madrid.”
Gjermani gjithashtu shtoi:
“Dua të shpenzoj më shumë kohë me gruan time dhe 3 fëmijët. Dëshiroj të kem pak kohë për veten, të cilën nuk kam pasur mundësi ta kem në 11 vite me kombëtaren e Gjermanisë. Ka qenë një nder për mua të mbaja veshur këtë fanellë për një kohë kaq të gjatë. Gjithmonë e kam bërë me krenari dhe pasion. Falenderoj të gjithë fansat, por dhe kritikët, të cilët më dhanë motivim shtesë.”
Në fund, Kroos nuk mund të linte pa falenderuar dhe trajnerin Low. Mesfushori u shpreh mirënjohës për besimin që numri 1 i pankinës gjermane i ka dhënë ndër vite. Sipas Toni, ishte Low ai që i dha mundësinë të shpallej kampion bote. Lojtari i Real Madrid bëri debutimin e tij me kombëtaren në vitin 2010, dhe u shpall kampion bote në vitin 2014, në Botërorin e Brazilit.
