Ceremonia e Topit të Artë 2022 nuk ka rezervuar surpriza, teksa Karim Benzema ka fituar për herë të parë në karrierën e tij, trofeun prestigjoz. Sulmuesi francez ishte i pandalshëm sezonin që lamë pas, teksa shënoi 44 gola në 46 ndeshje, duke ndihmuar Real Madrid të triumfojë në Champions League dhe në La Liga. Në 12 nga 13 edicionet e kaluara të Topit të Artë, trofeu është fituar nga Leo Messi dhe Cristiano Ronaldo.
Sadio Mane i Bayern Munich u rendit i dyti në klasifikimin e fituesit të çmimit, ndërkohë që në vendin e tretë ishte Kevin de Bruyne. Alexia Putellas e Barcelonës fitoi Topin e Artë për femra, ndërkohë që e dyta u rendit sulmuesja e Arsenal, Beth Mead. Kampionët e Premier League, Manchester City, morën trofeun e klubit më të mirë të vitit.
Benzema ishte i pari lojtar francez që ngriti lart trofeun e Topit të Artë, që prej vitit 1998, kur fitues ishte Zinedine Zidane. Ky i fundit ishte i pranishëm në ceremoni dhe i dorëzoi Benzema çmimin. Pas triumfit, sulmuesi i Real Madrid u shpreh i emocionuar:
“Trofeu përpara meje më bën shumë krenar. Kur isha i vogël, ishte një ëndërr fëmijërie. Nuk u dorëzova asnjëherë. Gjithçka është e mundur. Jam shumë krenar për udhëtimin tim deri këtu. Nuk ka qënë e lehtë, ka qënë një periudhë mjaft e vështirë dhe për familjen time.”
34 vjeçari është pjesë e Real Madrid që prej vitit 2009. Benzema pritet të luajë një rol kyç dhe në kombëtaren franceze, në prag të botërorit të Katarit, që është tashmë vetëm 1 muaj larg.
Robert Lewandowski i Barcelonës u rendit i katërti në lisën e të nominuarëve, ndërkohë që në vendin e pestë u rendit egjiptiani i Liverpool, Mohamed Salah.
