Nuno Espirito Santo, tashmë nuk do të jetë më në krye të Tottenham Hotspur. Portugezi qëndroi vetëm 17 ndeshje në stolin e londinezëve, por rezultatet e javëve të fundit ishin shumë larg pritshmërive të klubit dhe tifozëve.
Humbja e fundit 3-0 në shtëpi përballë Manchester United ka bërë që presidenti i klubit Daniel Levy, të ulet për të biseduar me drejtorin sportiv Fabio Paratici, në lidhje me fatin e Nuno Espirito Santo. Si përfundim, klubi ka dalë me një deklaratë zyrtare duke deklaruar shkarkimin e trajnerit portugez.
Ish-trajneri i Wolves lidhi një kontratë 2 vjeçare me anglezët në muajin qershor, por marrëveshja mes tij dhe Tottenham është ndërprerë para kohe. Pavarësisht startit pozitiv të Premier League, Spursat kanë humbur 5 nga 7 ndeshjet e fundit në kampionat. Tani që shkarkimi i Nuno u bë zyrtar, portale të ndryshme sportive po aludojnë se italiani Antonio Conte, mund të jetë tekniku i ri, që do të marrë drejtimin e Spursave.
Conte hoqi dorë nga drejtimi i Inter në muajin maj, menjëherë pasi fitoi kampionatin italian. Tekniku gjithashtu ka fituar Premier League dhe FA Cup me Chelsea, por në vitin 2018 u shkarkua nga klubi anglez, pas një sezoni të dështuar.
Drejtuesit e Tottenham besohet se janë në bisedime të avancuara me italianin, dhe zyrtarizimi i tij si tekniku i ri, mund të bëhet brenda kësaj jave. Ish-trajneri i Juventus komunikoi me Tottenham që në muajt e verës, pas shkarkimit të Jose Mourinho. Gjithsesi, asnjë marrëveshje nuk u arrit në ato momente.
Në qoftë se gjithçka zyrtarizohet, Conte pritet të aplikojë menjëherë metodat e tij tek ekipi anglez. Italiani njihet për natyrën e tij të veçantë të komunikimit me lojtarët, që shpesh herë mund të duket e ashpër. Por Antonio ka vërtetuar disa herë, se është i aftë të nxjerrë më të mirën prej futbollistëve të tij.
