Manchester United fitoi 2-0 ndaj Sheriff Tiraspol, në ndeshjen e vlefshme për grupin E të Europa League. Të besuarit e Erik ten Hag e startuan kompeticionin me humbje përballë Real Sociedad në shtëpi, por arritën të marrin 3 pikët në transfertë përballë ekipit moldav.
“Djajtë e Kuq” dominuan qartësisht takimin dhe përpjekjet e tyre të vazhdueshme u shpërblyen me gol që në pjesën e parë. Ishte Sancho që në minutën e 17’ konkludoi saktë një aksion mjaft të bukur, duke dërguar në rrjetë topin pas pasimit të Christian Eriksen. Anglezi iu afrua shumë golit të dytë disa minuta më vonë, por goditja e tij e ulët u largua në vijën e golit nga kapiteni i Sheriff, Stjepan Radeljic.
Gjithsesi, goli i dytë nuk do të vononte shumë për United. Në minutën e 39’ Cristiano Ronaldo konvertoi në gol një penallti të marrë nga Diogo Dalot, pas një faulli brenda zonës nga Patrick Kpozo. CR7 shënoi kështu golin e tij të parë në Europa League, i cili është dhe goli numër 699 në karrierën e tij në rang klubi. Sheriff nga ana tjetër nuk prodhoi asnjëherë një rast të rrezikshëm që të vinte në vështirësi portierin De Gea, dhe shifrat 2-0 nuk ndryshuan deri në fund të takimit.
Real Sociedad ndërkohë ia doli të fitojë 2-1 përballë Omonia Nicosia. Spanjollët kryesojnë grupin me 6 pikë pas 2 fitoreve.
Nga ana tjetër, shumë pak mund të thuhet për Sheriff, që vitin e kaluar prodhoi një nga momentet më spaktakolare të futbollit europian. Moldavët ia dolën të mposhtnin Real Madrid në fazën në grupe të Champions League, dhe ky rezultat është akoma më mbresëlënës duke marrë parasysh se galaktikët ishin ata që fituan në fund trofeun prestigjoz. Rezultatet e këtij viti në Europa League mund të justifikohen me faktin se organika e skuadrës ka ndryshuar shumë nga viti i kaluar, përfshirë këtu dhe trajnerin Yuriy Vernydub i cili u largua këtë vit.
