Trajneri i ri i Manchester United, Ralf Rangnick, dëshiron të sjellë në Old Trafford, sulmuesin gjerman të Chelsea, Timo Werner. Ish-trajneri i Leipzig ishte pikërisht personi që afroi sulmuesin nga skuadra e Stuttgart. Megjithëse Rangnick, për pjesën më të madhe të kohës, mbajti rolin e drejtorit teknik te Leipzig, ai u vendos në krye të pankinës gjatë sezonit 2018-2019.
Gjatë këtij sezoni, Werner zhvilloi paraqitje fantastike në nivel klubi, duke regjistruar 19 gola në 38 takime. Për më shumë, gjermani ishte autor dhe i 13 asisteve. Sezoni pasues ishte akoma më i mirë për sulmuesin, që shënoi plot 28 gola në Bundesliga. Performancat e këtij niveli ishin dhe arsyeja kryesore që bindi Chelsea për të afruar ish-lojtarin e Leipzig. Por që prej atij momenti, forma e Werner nuk ka qënë më e njejta. Golat në pozicion jashtë loje kanë dominuar aventurën e sulmuesit në Angli, por Rangnick beson se mund të marrë më të mirën e lojtarit tek United.
Sipas raportimeve të Bild, trajneri gjerman dëshiron t’i japë lojtarit mundësinë, që të “ringjallë” dhe një herë karrierën e tij tek “Djajtë e Kuq”. Detajet janë ende për t’u zbuluar, por marrëdhënia e mirë mes trajnerit të Chelsea, Thomas Tuchel, dhe Ralf Rangnick, mund të kontribuojë që lëvizja të finalizohet në merkaton e verës.
Para disa javësh, prestigjozja 90min raportoi se Werner është i lumtur tek Chelsea, por në të njejtën kohë, futbollisti është i hapur ndaj ofertave, duke qënë se situata e tij te blutë e Londrës sa vjen e bëhet më e vështirë. Sulmuesi gjerman ka ngjallur interesin dhe tek klubet e tjera europiane, mes tyre Bayern Munich, Barcelona dhe Borussia Dortmund.
Ndërkohë lojtari nuk është futbollisti i vetëm i Leipzig që ka kapur interesin e Ralf Rangnick. Mesfushori Amadou Haidara është gjithashtu një tjetër emër, për të cilin trajneri gjerman ka shfaqur simpati.
