Manchester United mesa duket do të presë fundin e këtij sezoni, për të konfirmuar zëvëndësuesin e Ole Solskjaer. Trajneri i përkohshëm i skuadrës, Michael Carrick, do të udhëheqë ekipin në pjesën e mbetur të sezonit. Kjo zgjedhje e United është diktuar fortë nga rrethanat, pasi bordi drejtues i anglezëve, nuk është në gjendje të sjellë në merkaton e janarit, një figurë të kalibrit të lartë që është e denjë për pankinën e klubit.
Ndërkohë 2 alternativat kryesore për merkaton e verës, që kryesojnë listën e “Djajëve të Kuq”, janë Erik ten Hag dhe Mauricio Pochettino. Ish-trajneri i Tottenham është momentalisht në krye të Paris Saint-Germain, por marrëdhënia e tij me francezët mund të ndryshojë në fund të sezonit, në varësi të performancës së parizienëve në Champions League.
Objektivi madhor i PSG gjatë viteve të fundit ka qënë triumfi në Europë. Për t’ia arritur këtij qëllimi, klubi francez ka sjellë teknikë të ndryshëm në krye të klubit, ndër të cilët: Carlo Ancelotti, Laurent Blanc, Unai Emery dhe Thomas Tuchel. Të gjithë këta trajnerë janë larguar nga klubi pasi kanë dështuar të fitojnë Champions League-ën. N.q.s Pochettino gjithashtu dështon, ai mund të jetë i lirë për një ofertë të mundshme nga United.
Erik ten Hag është alternativa e dytë e United. Trajneri i Ajax, sipas burimeve të Sky Ports, është 100% i gatshëm që të pranojë propozimin e United në verë. Hollandezi ka dhe 1 vit e gjysmë kontratë të vlefshme me klubin e tij aktual, por një marrëveshje mund të arrihet lehtë me Ajax, duke marrë parasysh dhe potencialin financiar të anglezëve.
Ndërkohë analisti sportiv Gary Neville tha se vendimi i United, për të pritur fundin e sezonit, për të vendosur mbi trajnerin e ri është i duhuri. Neville komentoi se pritja ia vlen, nëse në fund, “Djajtë e Kuq” bëjnë zgjedhjen e duhur.
