Pas një tjetër humbjeje, kësaj rradhe 4-1 përballë Watford, bordi drejtues i Manchester United ka vendosur më në fund të shkarkojë trajnerin Ole Solskjaer. Vendimi erdhi vetëm disa muaj, pasi tekniku norvegjez firmosi një kontratë të re afatgjatë me “Djajtë e Kuq”. Lajmi është pritur me pozitivitet nga shumica e fansave të klubit, të cilët kanë kërkuar prej javësh shkarkimin e trajnerit. Ndërkohë analistët dhe gazetarët sportivë në Angli, ishin pak a shumë në të njejtën vijë mendimi.
Gary Neville tha për Sky Sports:
“Duket qartë se ata po mundoheshin të shtynin shkarkimin në fund të sezonit. Tani nuk kanë më opsione (për postin e trajnerit). Askush nuk është i gatshëm të marrë detyrën. Bordi asnjëherë nuk do të vendoste në krye Antonio Conten. Planifikimi në klub ka qënë i keq. Është e treta herë që i japin një trajneri një kontratë afatgjatë, dhe më pas e shkarkojnë në mes të sezonit.”
Neville shtoi:
“Jam pak i shqetësuar në lidhje me situatën gjatë javëve të fundit, dhe sesi lojtarët në dhomat e zhveshjes kanë humbur unitetin. United është duke pritur Mauricio Pochettinom, por nëse ai fiton Champions League, PSG nuk do ta lëshojë.”
Ndërkohë ish-mesfushori i Liverpool dhe Tottenham, Jamie Redknapp, është i mendimit se Solskjaer asnjëherë nuk ishte njeriu i duhur për United:
“Tani Manchester United është si të gjitha ekipet e tjera. Ata duhet të fitojnë ndeshje. Mendoj se ata nuk e kanë idenë se çfarë janë duke bërë. Ole Gunnar Solskjaer asnjëherë nuk dha ndjesinë se ishte njeriu i duhur.”
Ish-mbrojtësi i United, Nedum Onuoha, vuri theksin te fakti që klubi nuk ka një plan afatgjatë. Zëvëndësuesi i përkohshëm i Solskjaer në krye të pankinës së United do të jetë Michael Carrick. Por bordi drejtues nuk ka një strategji në rast se Michael Carrick vazhdon ecurinë e rezultateve negative.
