Karriera e mesfushorit hollandez Donny van de Beek është në një moment mjaft delikat. Mesfushori i United është aktivizuar në vetëm 3 ndeshje me “Djajtë e Kuq” këtë sezon, dhe në njërën prej tyre, nuk e startoi takimin si titullar. 2 përballjet ku Van de Beek ishte në fushën e blertë që nga minuta e parë, rezultuan në disfata për United, specifikisht përballë Young Boys dhe West Ham.
Në të njejtën kohë, pozitat e tij tek kombëtarja hollandeze nuk janë më të mira. Mesfushori nuk është grumbulluar nga trajneri Van Gaal për kualifikueset e Botërorit të Katarit. Për këtë arsye, ai ndodhet momentalisht në kampin stërvitor të United.
Telashet me kombëtaren për De Beek, filluan me dëmtimin para startit të Euro 2020. Kjo gjë i kushtoi Europianin futbollistit, dhe eventualisht, kombëtarja hollandeze gjeti një ekuilibër të ri, pa patur nevojë për të në mesfushë. Hera e fundit që lojtari është aktivizuar me “tulipanët” ka qënë në fitoren 7-0 përballë Gjibraltarit në muajin mars.
Por përse mesfushori nuk u thirr nga Van Gaal për ndeshjen ndaj Letonisë? Faktor kryesor mendohet të jenë minutat e pakëta aktive në fushën e blertë me United.
Ardhja e Cristiano Ronaldo dhe Jesse Lingard ia ka vështirësuar akoma më shumë gjetjen e hapësirave në skuadër hollandezit. Megjithëse koha për t’iu përshtatur mjedisit të United ka qenë e gjatë, De Beek ka dhënë shumë pak në fushën e blertë. Mesfushori debutoi me gol në Premier League sezonin e parë të tij me United, por dhe ai moment u la në hije, pasi “Djajtë e Kuq” humbën takimin përballë Crystal Palace.
Deklarata e fundit e mesfushorit mbi situatën e tij tek United, erdhi muajin e kaluar. Van de Beek tha se i beson trajnerit Solskjaer, dhe në qoftë se nuk do t’i nevojitej ekipit, norvegjezi do t’ia komunikonte këtë gjë.
