Sipas Jurgen Klopp, trajnerit të Liverpool, kapiteni i Hollandës Virgil Van Dijk dhe Joe Gomez i përfaqësueses angleze nuk do të jenë gati për Euro 2020. Numri 1 i pankinës së “The Reds” ka thënë se dy futbollistët pritet të jenë të gatshëm në trajnim, vetëm në muajin korrik, duke hedhur poshtë mundësinë e një rikthimi më të hershëm. Ky është padyshim një lajm mjaft zhgënjyes për përfaqësuesen hollandeze dhe atë të “3 luanëve”.
Kujtojmë se Van Dijk dhe Joe Gomez kanë qëndruar jashtë fushave për disa muaj tashmë, si shkak i dëmtimeve serioze në gju. Për Liverpool do të mungojë dhe Joel Matip, i cili pritet të mbyllë sezonin jashtë fushave, gjithashtu i demtuar.
I pyetur për mundësinë e aktivizimit të lojtarëve në Euro 2020, Jurgen Klopp u shpreh specifikisht:
“Nuk është vendimi im, por nëse tregohem i sinqertë, në bazë të informacioneve që kam deri tani, nuk mendoj se do të jetë e mundur.”
Trajneri gjerman gjithashtu shtoi:
“Pra nuk është se nuk po i lë unë të shkojnë. Ka të bëjë me kohëzgjatjen e dëmtimit. Shpresoj shumë që ata (Van Dijk dhe Gomez) të jenë gati për seancat stërvitore përpara nisjes së sezonit të ri. Situata me Joel Matip është pak a shumë e njejtë. Virgil ndërkohë ka filluar të vrapojë, por dëmtimi ngelet delikat. E kuptoj rëndësinë e madhe që ka Euro 2020, por nuk mund të shpejtojmë procesin e rikuperimit. Lojtarët do të jenë gati kur të jenë gati.”
Mungesat e Joe Gomez, Joel Matip dhe Virgil Van Dijk janë pasqyruar qartë dhe në formën mjaft të dobët të Liverpool këtë sezon në Premier League. Ekipi i Klopp gjendet momentalisht në vendin e 8 në renditjen e përgjithshme, me qëllim kryesor sigurimin e një vendi në kupat e Europës për sezonin tjetër.
