Trajneri i Manchester United, Erik ten Hag, është shprehur për herë të parë për mediat pas zërave për largimin e Cristiano Ronaldos nga klubi këtë verë. Tekniku hollandez ka siguruar fansat e “Djajëve të Kuq” se C37 është në planet e ekipit këtë sezon, dhe se kartoni i tij nuk është në shitje.
Sulmuesi 37 vjeçar do të humbasë një pjesë të turit para-sezonal të United në Tailandë. Mediat angleze kanë raportuar së fundmi se portugezi kërkon të largohet nga Old Trafford, duke qënë se nuk është i bindur për planet dhe projektin që Manchester ka për të ardhmen. Por Ten Hag duket se kërkon diçka tjetër. Ish-trajneri i Ajax foli me mjaft siguri për të ardhmen e Ronaldos. Ai u shpreh:
“Ai (Ronaldo) nuk është me ne për shkak të shkaqeve personale. Po planifikojmë sezonin e ardhshëm së bashku me Cristiano Ronaldon. Kjo është e gjitha. Po pres të punoj me të shumë shpejt. Cristiano nuk është në shitje, ai është në planet tona. Ne dëshirojmë suksesin së bashku.”
Ten Hag konfirmoi se kishte komunikuar me Ronaldon, përpara startit të turit veror. Hollandezi gjithashtu komentoi mbi çështjen e shiritit të kapitenit, që u kthye në një problem sezonin që lamë pas:
“Patëm një bisedë të këndshme. Kjo mbetet mes Cristiano dhe meje, ajo se çfarë mund të them është se bëmë një bisedë shumë të mirë së bashku… Harry Maguire do të jetë kapiteni. Ai ka qënë kapiten prej më shumë se 1 viti dhe ka arritur shumë sukses. Nuk dyshime për këtë çështje.”
Deri më tani, afrimi i vetëm i United këtë merkato vere është Tyrell Malacia nga Feyenoord. I pyetur për situatën, trajneri Ten Hag nënvizoi se klubi rekruton lojtarë vetëm nëse ai beson se ata mund t’i përshtaten modulit të ri të lojës tek “Djajtë e Kuq”.