Sulmuesi brazilian i Arsenal, Gabriel Martinelli, ka rinovuar kontratën e tij me klubin londinez. Lojtari do të jetë pjesë e Arsenal deri në vitin 2027. Ai ka shënuar 7 gola në 27 ndeshje me fanellën e “topçinjëve” këtë sezon, teksa është një nga lojtarët më të rëndësishëm në ekipin e Mikel Artetës. Ndërkohë, drejtuesit e klubit janë gjithashtu ne bisedime me Bukayo Saka dhe William Saliba për rinovimin e kontratave të tyre.
Gabriel u shpreh se ndihej mjaft i lumtur për kontratën e re, dhe se do të japë më të mirën e mundshme për klubin dhe fansat, për t’i bërë ata krenarë.
Trajneri Arteta komentoi rinovimin e Martinelli, teksa u shfaq mjaft i lumtur për besimin e sulmuesit tek klubi. Tekniku spanjoll tha:
“Gabi është ende shumë i ri, kështu që e dimë se mund të presim ende shumë prej tij. Tifozët tanë e shohin kualitetin dhe energjinë e tij, sa herë që zbret në fushë me fanellën e Arsneal, ai është njësoj çdo ditë dhe në trajnim, me punën dhe vlerat e tij pozitive.”
Arteta shtoi:
“Tani jemi të lumtur për të vazhduar zhvillimin e talentit të tij dhe për ta parë atë me fanellën e Arsenal në vitet që vijojnë.”
Drejtori sportiv i Arsenal, Edu, gjithashtu përshëndeti lajmin e rinovimit të Gabriel:
“Është fantastike që Gabi ka firmosur një kontratë të re me ne. Themelet e skuadrës tonë vazhdojnë të ndërtohen mbi talentet e reja, prandaj është fantastike që Gabi ka nënshkruar një kontratë të re. Ai është ende vetëm 21 vjeç, një lojtar me aftësi dhe personalitet të madh. Ai është një pjesë e rëndësishme e së ardhmes tonë dhe jemi të lumtur që kemi rënë dakord për një kontratë të re.”
Martinelli ishte pjesë e kombëtares braziliane në botërorin e Katarit, dhe u aktivizua në 2 paraqitje me skuadrën. Për fatin e tij të keq, brazilianët nuk shkuan më shumë se çerekfinalet në kompeticionin prestigjoz.