Maroku u bë ekipi i parë afrikan që arrin në gjysmëfinalet e një botërori, pas fitores së bujshme 1-0 ndaj Portugalisë së Cristiano Ronaldo. Sulmuesi En-Nesyri shënoi golin e fitores në minutën e 42’, dhe pavarësisht përpjekjeve intensive të portugezëve për të gjetur barazimin, rezultati nuk ndryshoi deri në fund të takimit.
Ronaldo përsëri nuk startoi sfidën si titullar, teksa CR7 u hodh në fushën e blertë nga trajneri Santos në minutën e 50’. Gjithsesi, përfshirja e superstarit nuk ndikoi sa duhet në lojën e Portugalisë. Bruno Fernandes ishte shumë afër golit të barazimit, kur goditi traun e portës vetëm pak minuta pas golit të marokenëve. Këta të fundit luajtën në mbrojtje përgjatë pjesës së dytë, dhe shfrytëzuan herë pas here kundërsulmet për të kapur të papërgatitur mbrojtjen portugeze.
Në fundin e kohës së rregullt arbitri akordi 8 minuta shtesë, të cilat u karakterizuan nga emocionet dhe nervat. Sulmuesi i marokenëve Walid Cheddira u ndëshkua me karton të kuq, pas një tjetër kartoni të verdhë, por as kjo nuk i shërbeu Portugalisë që u largua kështu nga Katari me shijen e zhgënjimit.
Maroku ndërkohë do të përballet në gjysmëfinale me Francën, e cila ia doli të eleminojë Anglinë me rezultatin 2-1. Francezët kaluan në avantazh shumë shpejt me Tchouaméni në minutën e 17’, pas një goditje fantastike nga distanca. Reagimi i Anglisë nuk ishte ai i prituri, teksa “3 Luanët” e patën të vështirë të krijonin raste nga loja e hapur. Gjithsesi, të besuarit e Southgate gjetën golin e barazimit në minutën e 54’, kur Kane konvertoi saktësisht një penallti në gol.
Por goli i kapitenit të anglezëve nuk demoralizoi Francën, që vazhdoi përpjekjet e saj për të gjetur golin e fitores. Dhe momenti i shumëpritur për “gjelat” do të vinte në minutën e 78’. Autori i golit ishte Giroud, dhe tashmë të besuarit e Deschamps janë vetëm një hap larg finales së madhe të botërorit.
