Përballja më e fortë e Europianit deri më tani, ajo mes Francës dhe Gjermanisë, është tashmë vetëm 1 ditë larg. Në prag të sfidës, të dyja ekipet janë drejt përgatitjeve finale dhe trajnerët kanë përcaktuar formacionet e tyre. Për Didier Deschamps, orët e fundit kanë rezervuar një lajm mjaft të mirë. Karim Benzema është rikuperuar plotësisht nga dëmtimi i marrë përballë Bullgarisë, dhe do të jetë i gatshëm për “gjelat” në sfidën e tyre hapëse të Euro 2020.
Sulmuesi i Real Madrid u rikthye në kombëtaren franceze pas një mungese prej më shumë se 6 vitesh. Performanca e tij gjatë sezonit që lamë pas me Real Madrid ishte shumë e mirë për t’u injoruar nga Didier Deschamps. Benzema do të kompletojë kështu një treshe sulmi të frikshme, së bashku me Antoine Griezmann dhe Kylian Mbappe.
Ndërkohë, mosmarrëveshjet e ditëve të fundit mes Mbappe dhe Olivier Giroud padyshim që nuk e ndihmojnë Francën e Deschamps. Por, tani që Benzema është gati për të luajtur, sulmuesi i Chelsea me shumë mundësi nuk do të jetë titullar përballë Gjermanisë. Në këtë mënyrë, rikuperimi i asit të Real Madrid, duket se i ka dhënë zgjidhjen dhe këtij problem, pasi Mbappe dhe Giroud nuk do të jenë përkrah njëri-tjetrit.
Mesfusha e “bluve” pritet të formohet nga Corentin Tolisso, Paul Pogba dhe N’Golo Kante. Një treshe kjo energjike, e shpejtë dhe mjaft kreative, e gatshme për të ngritur në çdo çast aksione të rrezikshme. Në mbrojtje francezët pritet të hidhen në fushë me katërshen Raphael Varane and Presnel Kimpembe, Benjamin Pavard dhe Lucas Hernandez. Në këtë repart, të besuarit e Deschamps përsëri karakterizohen nga shpejtësia dhe natyra gjithpërfshirëse e lojtarëve, të cilët jo pak herë janë protagonistë dhe në sulm.
Në portë, veterani Hugo Lloris ofron siguri dhe eksperiencë, dhe kështu, duket se Franca ka gjetur formulën që pritet ta çojë drejt triumfit në Euro 2020.