Shancet që Karim Benzema të aktivizohet me kombëtaren franceze në Europian janë tashmë në dyshim. Kjo erdhi pas një dëmtimi që sulmuesi mori gjatë ndeshjes përgatitore të Francës përballë Bullgarisë, në prag të startit të Euro 2020.
Trajneri Didier Deschamps hodhi në fushë një formacion të mbushur plot me yje, sidomos në repartin ofensiv. Megjithëse kjo gjë u reflektua në performancën e mirë të “gjelave”, dëmtimi i Benzema duket se nuk ka lënë një shije të mirë në kampin francez. Sulmuesi i Real Madrid u përplas me një nga mbrojtësit bullgarë gjatë një beteje në ajër. Megjithëse francezi tentoi të vazhdonte lojën, ai u detyrua më vonë të linte fushën e blertë.
Gjithsesi, pas dëmtimit, Benzema iu drejtua stolit dhe jo tunelit të daljes. Ky fakt ka qetësuar dhe fansat, pasi tregon se dëmtimi nuk ka qenë i një shkalle serioze. Megjithatë, ky episod mund të ulë ndjeshëm shancet që sulmuesi të aktivizohet si titullar, në përballjen e parë të Francës në Europian përballë Gjermanisë.
Ndeshja është e një rëndësie të veçantë, jo vetëm pasi është takimi hapës për francezët, por dhe për shkak të kundërshtarit. Gjermania përbën testin e vërtetë për të besuarit e Deschamps, të cilët kuotohen si favoritët kryesorë për të ngritur lart trofeun prestigjoz.
Për tifozët francezë, lajmi i mirë është se nëse Benzema nuk është në formën e duhur, zëvëndësuesi i tij është përsëri një sulmues i kalibrit të lartë, si Olivier Giroud. Lojtari i Chelsea ka zhvilluar mbi 100 paraqitje me Les Blues, dhe ishte ndër lojtarët kyç që i sollën Francës triumfin në Kupën e Botës 2018. Megjithëse forma e sulmuesit ka pasur luhatje gjatë sezonit të fundit, Didier Deschamps nuk ka një alternativë më të mirë për të kompletuar qendrën e sulmit. Mbetet për t’u parë se cili do të jetë emri që do të udhëheqë sulmin e gjelave në Euro.