Kyle Walker ka pranuar talentin dhe aftësitë e jashtëzakonshme të Kylian Mbappe, por ka thënë se nuk do t’i shtrojë sulmuesit “tapetin e kuq” në përballjen mes Anglisë dhe Francës. Kombëtaret do të përballen ditën e shtunë, në një nga çerek-finalet më emocionuese të këtij botërori. Walker do të ketë detyrën e vështirë të markimit të Mbappe dhe mbrojtësi i “3 Luanëve” ka komentuar mbi sulmuesin francez:
“E kuptoj se çfarë duhet të bëj, dhe ajo është ta ndaloj atë (Mbappe). Sigurisht është më e lehtë ta thuash sesa ta bësh, por nuk e nënvlerësoj veten. Ai është një lojtar fantastik në formë shumë të mirë. Nuk do të jetë një detyrë e lehtë, por si një futbollist profesionist duhet të luash kundër më të mirëve dhe unë mendoj se ai është një nga më të mirët, në mos më i miri në botë, për momentin.”
Walker është përballur me Mbappe në Champions League, kur City sfidoi kampionët e Francës, PSG. Kylian pranoi pas sfidës se të luante përballë Walker ishte mjaft sfiduese. Ndërkohë mbrojtësi anglez shtoi:
“E di që ai është një lojtar elitar, por nuk po luajmë tenis. Nuk është një sport solo por në grup. Duhet t’i japësh atij respekt, por jo më shumë sesa duhet. Po, do të jetë një ndeshje e vështirë, por një ekip nuk mund të barazohet asnjëherë më një lojtar…Nuk do t’i shtroj atij tapetin e kuq dhe të pres që të shënojë. Jemi në një Kupë Bote, është jetë a vdekje.”
Walker bëri të qartë se Anglia nuk mund të gabojë, duke u përqëndruar tek Mbappe, dhe duke harruar lojtarët e tjerë tek “gjelat”. Mbrojtësi i City tha:
“Po, ai (Mbappe) është një armë e arsenalit të tyre, dhe një armë shumë e mirë, por nuk mund të nënvlerësojmë lojtarët e tjerë.”
